Wararka24: Madaxweynaha Somaliland Cabdiraxmaan Maxamed Cabdillaahi Cirro ayaa ku baaqay in la gaaro heshiis nabadeed oo dhex mara Somaliland iyo maamulka Waqooyi Bari, isaga oo sidoo kale soo jeediyay in la is-weydaarsado maxaabiista si loo yareeyo xiisadaha jira.
Madaxweynaha ayaa hadalkan ka jeediyay khudbaddiisa sanadlaha ah ee uu u jeediyay Baarlamaanka Somaliland, isagoo muujiyay rajo wanaagsan oo ku aaddan in khilaafaadka jira lagu xallin karo wadahadal iyo is-afgarad.
Cirro ayaa xusay in xukuumaddiisu ay xiriir la samaysay madaxda Waqooyi Bari, islamarkaana ay diyaar u tahay tallaabo kasta oo horseedi karta nabad waarta. Wuxuu tilmaamay in xaaladda gobolka Sanaag ay tusaale u tahay sida wada hadal lagu gaari karo xal nabadeed.
Sidoo kale, wuxuu sheegay in xiriirka ka dhexeeya Somaliland iyo gobollada sida Sool uu yahay mid qoto dheer oo ku saleysan dhaqan iyo wadaag bulsho, taas oo u baahan in lagu xalliyo si wadajir ah wixii tabasho ah ee jira.
Madaxweynaha ayaa bogaadiyay dadaallada nabadeed ee ay wadaan isimada iyo odayaasha dhaqanka, gaar ahaan ergadii uu hoggaaminayay Garaad Kulmiye, kuwaas oo booqashooyin ku tagay magaalooyinka Buuhoodle iyo Laascaanood.
Wuxuu intaas ku daray in Somaliland ay diyaar u tahay is-weydaarsiga maxaabiista iyada oo aan wax shuruud ah lagu xirin, isla markaana la dib u furo isku socodka dadka iyo ganacsiga si loo xoojiyo wada noolaanshaha bulshada.
Si kastaba, baaqan ayaa kusoo aadaya xilli ay weli jiraan xiisado ka taagan qaybo ka mid ah gobollada Sool iyo Sanaag, iyadoo dadaallo nabadeed ay socdaan.
Ugu dambayn, madaxweynaha ayaa sheegay in Somaliland ay diyaar u tahay dhismaha nabada, is-weydaarsiga maxaabiista oo aan shuruud lahayn, iyo in dib loo furo isku socodka dadka iyo ganacsiga si loo xoojiyo nabadda iyo wada noolaansha
