Wararka24: Siyaasiyiinta mucaaradka Soomaaliya ayaa la sheegay inay isku kala qaybiyeen degmooyin kala duwan oo ka tirsan magaalada Muqdisho, iyadoo ay sii dardargelinayaan abaabulka dibadbaxa ay qorsheynayaan inuu berri ka dhaco caasimadda.
Wararka la helayo ayaa sheegaya in xubnaha mucaaradka ay qorsheysteen inay isku fidiyaan degmooyinka Hodan, Dayniile, Cabdicasiis, Warta Nabadda, Kaxda iyo Kaaraan, si ay halkaas uga abaabulaan taageerayaashooda una fududeeyaan isu soo baxa.
Ilo xog ogaal ah ayaa sheegay in madaxweynihii hore ee Soomaaliya, Sheekh Shariif Sheekh Axmed, uu gaaray waqooyiga Muqdisho, gaar ahaan xaafadda Mirinaayo ee degmada Cabdicasiis, halkaas oo lagu wado inuu ka bilaabo dhaqdhaqaaqyada dibadbaxa.
Wararka ayaa tilmaamaya in qorshaha mucaaradka uu yahay in banaanbaxa laga bilaabo meelo kala duwan oo caasimadda ah, kadibna la mideeyo isu soo baxa si loo muujiyo cabashada la xiriirta dhulalka danta guud iyo barakicinta dadka shacabka ah.
Ra’iisul wasaarihii hore ee dalka Xasan Cali Khayre ayaa horey u sheegay in banaanbaxu uu bilaaban doono 7:00 subaxnimo, isaga oo shacabka ugu baaqay inay ka qayb qaataan si ay u muujiyaan dareenkooda una raadsadaan xuquuqdooda.
Khayre ayaa sidoo kale ka digay in ciidamada ammaanka loo adeegsado arrimo siyaasadeed, isagoo ku baaqay in dibadbaxu ahaado mid nabadeed oo aan loo adeegsan rabshado iyo qalalaase.
Dhanka kale, Dowladda Federaalka Soomaaliya ayaa horey uga digtay qabashada dibadbaxa, iyadoo sheegtay in tallaabo kasta oo halis gelin karta amniga caasimadda aan la aqbali doonin.
Xiisadda siyaasadeed ee Muqdisho ayaa sii xoogeysaneysa, iyadoo indhaha lagu hayo sida uu u qabsoomi doono dibadbaxa iyo saameynta uu ku yeelan karo xaaladda guud ee amniga iyo siyaasadda dalka.
