Wararka24: Madaxweynihii hore ee Soomaaliya, Maxamed Cabdullaahi Farmaajo, ayaa war saxaafadeed uu soo saaray uga hadlay xarigga dhalinyaro iyo wariyeyaal la sheegay inay ka horyimaadeen qorshaha dowladda ee la xiriira hanaanka doorashooyinka dalka.
Farmaajo ayaa sheegay in xarigyada isdaba joogga ah ee lagu hayo dhalinyarada iyo dadka uu ku tilmaamay haldoorka bulshada ay dhaawacayaan dowladnimada, isla markaana sii kordhinayaan caro iyo kacdoon bulsho oo ka dhan ah dowladda.
Wuxuu tilmaamay in tallaabooyinka noocan ah ay muujinayaan caburin siyaasadeed oo saameyn ku yeelan karta xasilloonida guud ee dalka, xilli Soomaaliya ay ku jirto marxalad siyaasadeed oo xasaasi ah.
Farmaajo ayaa si gaar ah farriin ugu diray hay’adaha amniga, isagoo ugu baaqay inay ilaaliyaan shacabka, kana fogaadaan fal kasta oo cabsi gelin kara bulshada ama horseedi kara barakac iyo kalsooni darro.
Wuxuu xusay in ciidamada qalabka sida loo aasaasay difaaca shacabka, sugidda amniga iyo dhowrista karaamada muwaadiniinta, islamarkaana aan loo adeegsan karin dano siyaasadeed ama dano gaar ah oo cid gaar ah ay leedahay.
Farmaajo ayaa sidoo kale sheegay in muddooyinkii dambe uu marar badan ka digay tallaabooyin uu ku tilmaamay kuwo dhaawacaya sumcadda dowladnimada iyo kalsoonida shacabka, kuwaas oo uu sheegay inay salka ku hayaan dhul boob, caburin iyo ku tagrifal awood.
Hadalka Farmaajo ayaa kusoo aadaya xilli mucaaradka Soomaaliya ay isku diyaarinayaan dibadbax ballaaran oo lagu wado inuu ka dhaco magaalada Muqdisho berito, kaas oo lagu muujinayo diidmada qorshayaasha dowladda iyo xaaladaha la xiriira barakicinta shacabka.
Xiisadda siyaasadeed ee dalka ayaa sii kordheysa, iyadoo wali ay taagan tahay doodda ku saabsan hannaanka doorashooyinka iyo sharciyadda hay’adaha dowladda.
