Wararka24: Madaxweynihii hore ee Soomaaliya, Maxamed Cabdullaahi Farmaajo, ayaa ka hadlay xaaladda siyaasadeed ee dalka, isaga oo ku baaqay in xal degdeg ah laga gaaro muranka ka taagan doorashooyinka iyo kala guurka siyaasadeed.
Farmaajo ayaa sheegay in muddada sharciyeed ee Madaxweynaha hadda talada haya, Xassan Sheekh Maxamud, ay ku eg tahay 15-ka May 2026, taas oo uu ku tilmaamay xilli xasaasi ah oo u baahan go’aan mideysan iyo hannaan siyaasadeed oo la isku raacsan yahay.
Wuxuu carrabka ku adkeeyay in maalmaha kooban ee harsan loo baahan yahay in xoogga la saaro dhismaha hannaan doorasho oo loo dhan yahay, si looga hortago khilaaf horleh iyo qalalaase siyaasadeed oo dalka ka dhasha.
Farmaajo ayaa sheegay in geeddi-socodka doorashada uu yahay arrin masiiri ah oo u baahan wadatashi dhab ah, isla markaana ay muhiim tahay in dhinacyada siyaasadda ay ku heshiiyaan waddada loo marayo doorasho lagu wada kalsoonaan karo.
Sidoo kale, madaxweynihii hore ayaa ugu baaqay dowladda federaalka inay si degdeg ah u sii deyso wariyeyaasha iyo dadka uu sheegay inay u istaageen difaaca bulshada, isaga oo xusay in xarigyadaasi ay ka hor imaanayaan dastuurka iyo xeerarka dalka.
Dhanka kale, Farmaajo ayaa si adag u dhaliilay qorshaha dowladda ee ku saabsan dhismaha guryo loo sameynayo qaar ka mid ah qoysaska barakacayaasha ah ee laga raray Muqdisho, isaga oo sheegay in arrintaasi ay u muuqato mid lagu dejinayo cadaadiska bulshada.
Wuxuu tilmaamay in aanay jirin miisaaniyad hore loogu qorsheeyay mashruucaas, taas oo shaki gelinaysa sida loo fulin karo xilli dowladda waqtigeedu gabaabsi yahay, iyadoo weli muranka doorashada uu taagan yahay.
