Wararka24: Dowladda Federaalka Soomaaliya ayaa sheegtay in aysan diidaneyn bannaanbax ay mucaaradku ka dhigaan magaalada Muqdisho, balse ay shardi uga dhigtay in uu noqdo mid nabadeed oo aan wax hub ah lagu soo qaadan.
Wasiirka Gaashaandhigga Soomaaliya, Axmed Macallin Fiqi, ayaa sheegay in dowladda ay taageersan tahay xorriyad muujinta, hase yeeshee aysan aqbali doonin in bannaanbax lagu dhex qaato hub ama lagu cabsi geliyo shacabka.
Fiqi ayaa xusay in bannaanbax nabadeed oo dadku ku cabbirayaan dareenkooda uu yahay xuquuq dastuuri ah, balse dowladda ay si dhow ula socon doonto amniga iyo habsami u socodka isu soo bax kasta oo la qabanayo. Wuxuu sidoo kale sheegay in dowladda ay tallaabo ka qaadi doonto cid kasta oo ku xadgudubta sharciga.
Dhanka kale, wasiirka ayaa si adag u dhaliilay qaar ka mid ah siyaasiyiinta mucaaradka, isagoo ku eedeeyay inay xaaladda siyaasadeed uga faa’iideysanayaan dano gaar ah iyo taageero dibadeed. Hadalladiisa ayaa kusoo aadaya xilli xiisadda siyaasadeed ee dalka ay sii xoogeysaneyso.
Mucaaradka Soomaaliya ayaa ku dhawaaqay bannaanbax weyn oo la qorsheeyay 10-ka bishan, iyagoo ugu baaqay shacabka Muqdisho inay kasoo qeyb-galaan si ay uga hor imadhaan arrimo ay ku tilmaameen dhul-boob iyo cadaadis siyaasadeed.
Bannaanbaxan ayaa ku beegan isla maalinta uu Madaxweynaha Soomaaliya Xassan Sheekh Maxamud ku casuumay hoggaanka mucaaradka kulan wadatashi ah oo looga hadlayo xaaladda siyaasadeed, doorashooyinka iyo muranka ka taagan dastuurka KMG ah.
