Wararka24: Mucaaradka Soomaaliya ayaa wajahaya cadaadis diblomaasiyadeed oo sii kordhaya, kadib markii Beesha caalamka ay si isku mid ah u soo dhaweeyeen gogosha wadahadal ee uu fidiyay Madaxweynaha Soomaaliya Xasan Sheekh Maxamud. Casuumaaddan ayaa la xiriirta kulanka la qorsheeyay 10-ka May, kaas oo diiradda lagu saarayo arrimaha doorashooyinka, dowlad-dhiska iyo jihada siyaasadeed ee dalka.
Midowga Yurub, Qaramada Midoobay iyo Boqortooyada Ingiriiska ayaa dhammaantood muujiyay taageerada ay u hayaan dadaallada wadahadalka, iyagoo ku baaqay in dhinacyada siyaasadda ay ka qeyb galaan wada-hadal miro dhal ah.
Safiirka Midowga Yurub ee Soomaaliya Francesca Di Mauro ayaa sheegtay in loo baahan yahay jawi wadahadal iyo is-afgarad lagu wajaho xaaladda siyaasadeed ee cakiran. Waxay xustay in Midowga Yurub diyaar u yahay taageeridda dadaallada lagu garaya is afgarad.
Sidoo kale, howlgalka Qaramada Midoobay ee Soomaaliya iyo safaaradda Britain ee Muqdisho ayaa ku celiyay in xilligan xasaasiga ah wadahadalku yahay waddada ugu habboon ee lagu gaari karo xasillooni siyaasadeed iyo heshiis qaran.
Dhanka kale, xubnaha mucaaradka ayaa weli ku adkeysanaya mowqifkooda ah in muddo-xileedka madaxweynaha uu ku egyahay 15-ka May, iyagoo ka digay muddo-kordhin aan heshiis siyaasadeed lagu dhisin. Waxay sidoo kale sheegeen inay dhowaan soo bandhigi doonaan hannaan doorasho oo ay u arkaan mid dalka lagu maamuli karo.
Kulanka 10-ka May ayaa hadda loo arkaa mid go’aan ka gaari kara jihada siyaasadeed ee Soomaaliya, iyadoo beesha caalamka iyo shacabka Soomaaliyeed ay isha ku hayaan waxa kasoo bixi doona wada-hadallada dowladda iyo mucaaradka.
