Wararka24: Xiisad culus ayaa maanta laga soo sheegay xaafadda Iskuul Buluusiyo ee degmada Xamar Jajab, kadib iska horimaad dhex-maray ciidamo ka tirsan dowladda iyo askar kale oo boolis ah oo la sheegay inay deggenaayeen deegaankaas.
Sida ay sheegeen ilo deegaanka ah, ciidamada dowladda oo wata gaadiid dagaal iyo cagaf-cagafyo ayaa saaka gudaha u galay xaafadda, iyaga oo bilaabay burburin la xiriirta dhismayaal halkaasi ku yaalla, taas oo dhalisay iska horimaad hubeysan.
Dadka deegaanka ayaa sheegay in rasaasta la is-weydaarsaday ay sababtay dhimashada laba carruur ah iyo dhaawaca dad kale oo rayid ah. Wararka ayaa sidoo kale sheegaya in haweeney uur leh oo dhaawac culus soo gaartay ay markii dambe geeriyootay.
Qaar ka mid ah shacabka deegaanka ayaa sheegay in xaaladda ay kusoo korortay cabsi iyo barakac, iyadoo hanti badan lagu daadiyay waddooyinka kadib burburinta la sameeyay.
Ilaa hadda ma jiro war rasmi ah oo kasoo baxay maamulka degmada ama saraakiisha ammaanka ee dowladda Soomaaliya oo ku saabsan sababta rasmiga ah ee howlgalka iyo khasaaraha ka dhashay.
Xaaladda deegaanka ayaa weli kacsan, waxaana la arkayaa dhaq-dhaqaaqyo ciidan iyo saraakiil amni oo gaaray goobta si ay xaaladda u dejiyaan.
Dhacdadan ayaa kusoo aadeysa xilli dowladda Soomaaliya ay maalmihii dambe wadday burburin iyo dib-u-habeyn dhulal ku yaalla qaar kamid ah degmooyinka gobolka Banaadir, arrintaas oo mararka qaar dhalisay muran iyo iska horimaadyo.
DAAWO
