Wararka24: 24-01-2026 Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa xalay booqasho kadis ah ku tegay qaar ka mid ah goobaha nasiinada ee magaalada Muqdisho, halkaas oo uu kula kulmay dadweyne ku sugnaa goobahaasi.
Madaxweynaha ayaa waqti la qaatay muwaadiniinta ku caweynayay goobaha uu booqday, isaga oo la sheekaystay, dhageystay talooyinkooda, kana mahadceliyay doorka ay ka qaataan ilaalinta amniga, is-dhexgalka bulshada, dib-u-dhiska iyo horumarka dalka.
Tallaabadan ayaa dhalisay falcelin xooggan oo kala duwan, kuwaas oo si weyn loogu baahiyay baraha bulshada, iyadoo dadku ay aragtiyo kala geddisan ka dhiibteen booqashada Madaxweynaha.
Axmed Abuukar ayaa yiri:
“Madaxweyne iyo shacabkiisa waqti wada qaadanayaan Alhamdulillaah. Alle nabadda ha inoogu siyaadiyo.”
Cabdullaahi Toosane ayaa isna yiri:
“Xamar amni maahan kuwii lahaa, caawa kadib maxay dhihi rabaan?”
Cabdiraxmaan Koronto ayaa ku faallooday:
“Kala wanaagsan ninka maqaayadda faynuus u soo dalxiis tagey, iyo midka Talaabiib dhuumashada ku aada.”
Nageeye Xasan ayaa sheegay:
“Fariintaan waxay ku socotaa Deni iyo Axmed Madoobe oo doonaya inay Xamar hub kusoo galaan.”
Dhanka kale, Bashiir Cabdullaahi ayaa yiri:
“Alxamdulillaah Alle na siiyay nabaddan ayaa mahad leh. Ilaahow waxa naga dhiman noo dhamaystir, guulayso Mudane Madaxweyne.”
Booqashada Madaxweynaha ayaa ku soo aaday xilli ay jirto dood ku saabsan xaaladda amniga caasimadda, waxaana dad badan ay u arkeen tallaabadan farriin muujinaysa kalsoonida hoggaanka dalka ee amniga Muqdisho.
