Wararka24: 24-01-2026 Hay’adda Sirdoonka iyo Nabadsugidda Qaranka (NISA) ayaa shaacisay inay gacanta ku dhigtay shabakad ka kooban shan xubnood oo ka tirsan Al-Shabaab, kuwaas oo lagu eedeeyay inay qorsheynayeen falal amni-darro ah oo ka dhaca magaalada Muqdisho.
War-saxaafadeed kasoo baxay taliska NISA ayaa lagu sheegay in ciidamada sirdoonka ay shabakaddan ku qabteen duleedka caasimadda, xilli ay diyaarinayeen in hub, gaadiid iyo walxo qarxa si qarsoodi ah loogu soo geliyo gudaha Muqdisho.
“NISA oo si dhow ula socotay dhaqdhaqaaqa shabakaddan ayaa ku guuleysatay inay gacanta ku dhigto walxo qarxa oo kala duwan, hub iyo gaadiid ay wateen,” ayaa lagu yiri bayaanka hay’adda.
NISA ayaa sheegtay in eedeysanayaasha la qabtay ay ka tirsan yihiin Al-Shabaab, isla markaana ay qorsheynayeen falal lid ku ah amniga qaranka. Hay’addu ma shaacin magacyada shanta qof ee la qabtay, balse waxay xaqiijisay in loo gudbin doono hay’adaha caddaaladda si sharciga loo waafajiyo.
Howlgalkan ayaa ku soo aadaya xilli dowladda Soomaaliya ay sheegtay inay guulo ka gaartay wiiqidda awoodda farsamo ee Al-Shabaab. Horraantii bishan Janaayo, NISA ayaa shaacisay dilka Cabdullaahi Cismaan Maxamed, oo loo yaqaanay “Injineer Ismaaciil,” kadib howlgallo ka dhacay degmada Jilib, kaas oo lagu tilmaamay inuu ahaa mas’uul sare oo ku lug lahaa diyaarinta qaraxyada.
Saraakiisha amniga ayaa Injineer Ismaaciil ku sifeeyay inuu ka mid ahaa hoggaanka sare ee shabakadda qaraxyada iyo sirdoonka Al-Shabaab, isla markaana lagu eedeeyay door ku lug lahaansho weerarro hore oo waaweyn.
Inkasta oo dowladda ay sheegtay inay dishay horjoogayaal sare, falanqeeyayaal dhinaca amniga ah ayaa tilmaamaya in Al-Shabaab ay weli awood u leedahay isku-dayo qorsheysan, iyagoo xusay in qabashada shabakaddan ay muujinayso in kooxdu ay weli waddo dadaallo ay ku beegsaneyso caasimadda.
Magaalada Muqdisho ayaa guud ahaan lagu tilmaamaa mid ka xasilloon marka loo eego sanado hore, balse laamaha amniga ayaa sheegay inay ku jiraan heegan joogto ah si looga hortago khatar kasta oo amni.
wixii so kordha halkan kala soco WARARKA24
