Wararka24: Saddex sarkaal oo sare oo ka tirsan Ciidamada Difaaca Uganda kana mid ahaa howlgalka AUSSOM ee Soomaaliya ayaa la xiray kadib markii lagu soo oogay dacwad la xiriirta burbur diyaarad militari.
Saraakiisha la xiray ayaa kala ah Korneyl George Buga Andruca, Major Benjamin Kashumbusha iyo Lieutenant Henry Gygenda, kuwaas oo ka tirsanaa cutubka duulista ee ciidamada Uganda.
Dacwadda ayaa la xiriirta shil diyaaradeed oo ka dhacay Soomaaliya bishii Sebtembar 2024, kaas oo la sheegay in uu ka dhashay hawlgal si khaldan loo fuliyay.
Saddexdan sarkaal ayaa ka soo hor muuqday guddi garsoor oo uu hoggaaminayo Korneyl Frederick Kangwamu, halkaas oo lagu soo oogay hal dambi oo la xiriira dayacaad sababay khasaaraha diyaaradda.
Dhamaan saraakiisha ayaa beeniyay eedaha loo jeediyay, iyagoo wajahaya ciqaab adag haddii lagu helo dambiga lagu soo oogay.
Xeer ilaalinta ayaa sheegtay in baaritaannada wali socdaan, taasoo sababtay in kiiska dib loo dhigo, iyadoo maxkamaddu amartay in saraakiisha lagu sii hayo xabsi ilaa 4ta April 2026.
Diyaaradaha militari ee Uganda ee ka howlgala Soomaaliya ayaa door muhiim ah ka qaata howlgalada AUSSOM, inkastoo sanadihii dambe ay jireen shilal soo noqnoqday oo sababay khasaare naf iyo maalba leh.
