Wararka24: Doon la sheegay inay leedahay Iiraan ayaa lagu weeraray meel qiyaastii 400 mayl badeed u jirta xeebaha magaalada Muqdisho, sida ay sheegeen ilo amni oo caalami ah.
Warbixin kasoo baxday howlgalka badda ee Midowga Yurub ayaa tilmaamtay in doonida ay weerareen kooxo hubeysan xilli ay ku sugneyd biyaha Badweynta Hindiya.
Sidoo kale, xarunta amniga badda ee gobolka ayaa sheegtay in doonida ay la wareegeen kooxo la tuhunsan yahay inay yihiin burcadbadeed Soomaali ah, iyadoo aan la ogeyn halka ay hadda ku sugan tahay.
Wararka ayaa intaas ku daraya in baadi goob xooggan lagu hayo doonida, si loo ogaado halka la geeyay iyo xaaladda shaqaalaha saarnaa.
Illaa hadda ma jiro wax war ah oo rasmi ah oo kasoo baxay dowladda Soomaaliya oo ku aaddan dhacdadan, taasoo keentay walaac cusub oo la xiriira amniga xeebaha.
Dhacdadan ayaa kusoo aadeysa xilli laga digayo soo laabashada burcadbadeedda, taas oo khatar ku ah maraakiibta isticmaasha xeebaha Soomaaliya.
Dowladda Soomaaliya iyo saaxiibada caalamiga ah ayaa sheegay inay sii wadi doonaan dadaallada lagu xoojinayo amniga badda iyo ka hortagga burcadbadeedda.
