Wararka24: Wasaaradda Arrimaha Gudaha, Federaalka iyo Dib u heshiisiinta Soomaaliya ayaa soo saartay wareegto ku saabsan xil haynta maamullada heer gobol iyo heer degmo ee Dowlad Goboleedka Koonfur Galbeed.
Wareegtada ayaa lagu sheegay in dhammaan maamullada heer degmo iyo gobol ay sii wataan shaqooyinkooda si caadi ah, ilaa laga soo dooranayo goleyaal cusub oo beddela si waafaqsan sharciga.
Wasaaradda ayaa tilmaantay in go’aankan uu ku saleysan yahay xaaladaha siyaasadeed iyo amni ee ka jira deegaanada Koonfur Galbeed, si looga hortago firaaq maamul iyo carqalad ku timaada adeegyada bulshada.
Sidoo kale, wasaaradda ayaa sheegtay in madaxda sare ee maamulka ay ku jiraan muddo dhaaf xileed, taasoo u baahan xal sharciyeysan oo waafaqsan nidaamka dowladnimada.
Qoraalka ayaa xusay in wasaaradda, iyadoo la tashaneysa odayaasha dhaqanka, ay si gaar ah u ilaalin doonto maamullada jira, isla markaana ay buuxin doonto xilalka bannaan ee ka dhasha.
Waxaa sidoo kale la faray hay’adaha amniga iyo dhammaan xafiisyada ay khusayso wareegtada inay dhaqan geliyaan go’aankan, si loo xaqiijiyo xasilloonida iyo sii socoshada maamulka.
Tallaabadan ayaa kusoo aadeysa xilli uu jiro khilaaf siyaasadeed oo u dhexeeya Dowladda Federaalka iyo maamulka Koonfur Galbeed.
