Wararka24: Madaxweyne ku xigeenka Galmudug Cali Daahir Ciid ayaa sheegay in maamulkiisu diyaar u yahay inuu dhexdhexaadiyo khilaafka u dhexeeya Dowladda Federaalka Soomaaliya iyo maamulka Koonfur Galbeed.
Cali Daahir Ciid ayaa xusay in Galmudug ay gogol u dhigi doonto labada dhinac si dib loogu soo celiyo wadahadal iyo is afgarad, isaga oo tilmaamay in khilaafyada siyaasadeed ay halis ku yihiin xasilloonida dalka.
Wuxuu sheegay in Galmudug ay diyaar u tahay inay ka shaqeyso xal u helidda arrimaha ka taagan Muqdisho iyo Baydhaba, isagoo ugu baaqay dhinacyada inay muujiyaan tanaasul.
Madaxweyne ku xigeenka ayaa sidoo kale ugu baaqay culimada, odayaasha dhaqanka iyo siyaasiyiinta inay ka qeyb qaataan dadaallada lagu dejinayo xiisadda, isla markaana dib loogu soo celiyo wadahadalka.
Wuxuu ka digay in khilaafyada noocan ah ay wiiqi karaan nabadda iyo horumarka dalka, haddii aan si degdeg ah loo xallin.
Cali Daahir Ciid ayaa soo dhaweeyay baaqyada ku aaddan wada hadal, wuxuuna ugu baaqay madaxda Koonfur Galbeed inay ka qeyb qaataan xalinta khilaafka.
Ugu dambeyn, wuxuu carrabka ku adkeeyay in xal waara lagu gaari karo oo keliya wadahadal iyo is afgarad, isagoo xusay in Soomaalida ay mas’uul ka tahay ilaalinta midnimadeeda iyo dowladnimadeeda.
DAAWA
