Wararka24: Dowladda Mareykanka ayaa ku dhawaaqday in muwaadiniinta ka socda 50 dal laga rabo inay bixiyaan lacag damaanad ah oo gaareysa ilaa $15,000 si ay u dalbadaan fiisaha dalxiiska iyo ganacsiga.
Go’aankan oo uu xaqiijiyay sarkaal ka tirsan Wasaaradda Arrimaha Dibadda ayaa kusoo aadaya kadib markii 12 dal oo cusub lagu daray liis hore oo ka koobnaa 38 waddan, taasoo ka dhigeysa tirada guud 50 dal .
Barnaamijkan ayaa la filayaa inuu dhaqan galo 2-da bisha April, waxaana uu khuseeyaa fiisooyinka nooca B1 iyo B2, iyadoo lacagta la dhigayo ay u dhexeyn karto $5,000 ilaa $15,000, sida ay go’aamiyaan saraakiisha qunsuliyadaha .
Ujeeddada tallaabadan ayaa lagu sheegay in lagu yareeyo dadka ku sii nagaada Mareykanka kadib marka uu ka dhaco waqtiga fiisahooda, iyadoo dowladda ay sheegtay in nidaamkan uu hore u muujiyay natiijooyin wanaagsan .
Sida lagu sheegay qorshaha, lacagta damaanadda ah waxaa dib loogu celinayaa qofka haddii uu u hoggaansamo shuruudaha fiisaha ama haddii uu go’aansado inuusan safarka sameyn .
Dalalka cusub ee lagu daray liiska waxaa ka mid ah Ethiopia, Tunisia, Mozambique, Cambodia iyo kuwo kale, kuwaas oo inta badan lagu doortay heerarka sare ee ku xadgudubka shuruudaha fiisaha .
Tallaabadan ayaa qeyb ka ah siyaasadaha adag ee socdaalka ee maamulka Madaxweyne Donald Trump, kuwaas oo sidoo kale ay ku jiraan xayiraado safar, tarxiil iyo adkeynta baaritaanka dadka soo galaya dalka .
Dhinaca kale, hay’adaha xuquuqda aadanaha ayaa dhaliilay nidaamkan, iyagoo sheegay inuu culays dhaqaale saarayo dadka safarka doonaya isla markaana uu xaddidi karo helitaanka fiisaha.
