Wararka24: Golaha Mustaqbalka Soomaaliyeed oo ay ku mideysan yihiin Jubbaland, Puntland iyo Madasha Samatabixinta ayaa taageero u muujiyay madaxweynaha Koonfur Galbeed Cabdicasiis Lafta-gareen, kadib go’aanno uu ku jaray xiriirka dowladda Federaalka.
Golaha ayaa soo dhaweeyay go’aanka Lafta-gareen uu ku qaadacay dastuurka cusub ee la ansixiyay, isaga oo sheegay in maamulka Koonfur Galbeed uu weli aqoonsan yahay dastuurkii KMG ahaa ee 2012.
Sidoo kale, Golaha Mustaqbalka ayaa taageeray qorshaha Koonfur Galbeed ay ku qabaneyso doorasho, iyagoo ugu baaqay maamul goboleedyada kale ee Galmudug iyo HirShabelle inay sidoo kale galaan doorashooyin.
Qoraal ay soo saareen ayaa waxaa digniin loogu diray madaxweyne Xasan Sheekh Maxamuud, iyagoo ka digay in ciidamada qalabka sida loo adeegsado arrimo siyaasadeed iyo khilaafaad gudaha ah.
Bayaanka ayaa lagu sheegay in goluhu uu diidan yahay wax ka beddelka dastuurka ee ay ku tilmaameen mid sharci darro ah, isla markaana ay ka digayaan ku takrifalka hay’adaha dowladda ee xasaasiga ah.
Taageeradan ayaa timid kadib markii Lafta-gareen uu soo saaray go’aanno ay ku jiraan qabashada doorasho iyo joojinta xiriirka dowladda dhexe, arrintaas oo sare u qaaday xiisadda siyaasadeed ee ka taagan Koonfur Galbeed.
Xiisadda ayaa weli taagan, iyadoo wararka laga helayo deegaannadaasi ay muujinayaan dhaqdhaqaaqyo ciidan iyo cabsi laga qabo isku dhacyo hor leh.
Akhriso Qoraalka ay soo saareen Golaha Mustaqbalka
