Wararka24: 10-02-2026 Maamulka Somaliland ayaa shaaciyay inuu dacwad caalami ah ka gudbiyay Dowladda Federaalka Soomaaliya, taas oo la xiriirta maamulka hawada ee dalka.
Wasiirka Duulista iyo Horumarinta Madaarada Somaliland Fu’aad Axmed Nuux ayaa sheegay in dacwadda loo gudbiyay hay’adda duulista hawada ee Qaramada Midoobay, iyadoo ujeedadu tahay in Somaliland ay si madax-bannaan u maamusho hawadeeda.
Wasiirka ayaa ku dooday in dowladda Federaalka Soomaaliya aysan si toos ah u maamulin hawada Somaliland, isla markaana aysan awood u lahayn inay bixiso adeegyada la xiriira maareynta hawada iyo garoomada diyaaradaha ee Hargeysa iyo Berbera.
“Soomaaliya ayaannu dacweynaynaa, waayo waxay sheeganaysaa in ay hawada Somaliland maamusho, mana maamusho, mana joogto, amarkeeduna kama shaqeeyo,” ayuu yiri wasiirka oo wareysi siiyay telefishinka MMTV.
Wasiir Fu’aad ayaa sidoo kale sheegay in Somaliland ay doonayso in hawadeeda lagu dhaqo xeerarka dalalka qayb ahaan la aqoonsaday sida Kosovo iyo Taiwan, kuwaas oo loo oggolaaday inay si madax-bannaan u maamulaan hawadooda.
Dhanka kale, Dowladda Federaalka Soomaaliya ayaa hore u sheegtay in nidaamka e-Visa ee ay hirgelisay uu yahay mid lagu xoojinayo la socodka dadka soo galaya dalka iyo kor u qaadista amniga.
