Wararka24: 9-02-2026 Madaxweynaha Mareykanka Donald Trump ayaa markii ugu horreysay si kooban uga falceliyay magacaabista Mojtaba Khamenei oo loo doortay Hoggaamiyaha Sare ee cusub ee dalka Iiraan.
Trump ayaa sheegay inuusan ku faraxsanayn go’aankaas, isagoo xusay in jihada dagaalka u dhexeeya Mareykanka iyo Iiraan ay si wadajir ah uga go’aamin doonaan isaga iyo Ra’iisul Wasaaraha Israa’iil Benjamin Netanyahu.
Sida uu sheegay wariye ka tirsan Fox News, Trump ayaa xaqiijiyay inuu ka xun yahay doorashada hoggaamiyaha cusub ee Iiraan, isagoo tilmaamay in xaaladda gobolka ay weli tahay mid kacsan.
Madaxweynaha Mareykanka ayaa sidoo kale muujiyay in fursadaha wadahadalka ee u dhexeeya Washington iyo Tehran ay aad u yaraadeen, maadaama hoggaamiyaha cusub ee la magacaabay uu xiriir dhow la leeyahay nidaamka talada haya iyo Ciidamada Ilaalada Kacaanka Islaamiga ah.
Mojtaba Khamenei ayaa loo doortay hoggaamiyaha cusub kadib markii aabbihiis Aayatullaahi Cali Khamenei lagu dilay duqeyn dhowaan dhacday, taas oo sii xoojisay xiisadda ka taagan gobolka Bariga Dhexe.
Magacaabistan ayaa la rumeysan yahay inay xoojisay awoodda garabka mayalka adag ee Iiraan, iyadoo hoggaamiyaha cusub uu xiriir dhow la leeyahay hay’adaha amniga iyo milateriga ee dalka.
