Wararka24: 5-02-2026 Ciidamada Iiraan ayaa sheegay in ay weerarro gantaallo ah ku qaadeen saldhigyo ay leeyihiin kooxaha Kurdiyiinta ee mucaaradka ku ah dowladda Tehran, kuwaas oo ku sugan waqooyiga dalka Ciraaq.
Bayaan ay baahisay warbaahinta dowladda Iiraan ayaa lagu sheegay in ciidamada dalkaasi ay saddex gantaal ku beegsadeen “kooxo Kurdiyiin ah oo ka soo horjeeda kacaanka Iiraan” oo ku sugan dhulka Kurdistaan ee Ciraaq.
Weerarradan ayaa kusoo aadaya xilli ay sii kordhayaan duqeymaha ay Iiraan ka fulinayso deegaanada ay ku sugan yihiin kooxaha Kurdiyiinta ee mucaaradka ku ah dowladda, kuwaas oo ku kala yaalla gudaha Iiraan iyo waqooyiga Ciraaq.
Warbaahinta BBC ayaa sheegtay in ugu yaraan hal qof uu ku dhintay saddex kalena ay ku dhaawacmeen weerarro ay ciidamada Iiraan Talaadadii iyo Arbacadii ku qaadeen laba saldhig oo ay leeyihiin kooxaha mucaaradka Kurdiyiinta.
Mid ka mid ah gantaallada ayaa la sheegay inuu ku dhacay saldhig ay ku sugnaayeen ciidamada Peshmerga, taas oo dhaawacday afar askari, mid ka mid ahna uu markii dambe u geeriyooday dhaawacii soo gaaray. Weerarka ayaa sidoo kale burburiyay qayb ka mid ah dhismaha saldhigga.
Dhanka kale, saldhig ay leedahay xisbiga Democratic Party of Iranian Kurdistan (KDPI) ayaa la sheegay in lagu qaaday laba weerar oo diyaarado aan duuliye lahayn, kuwaas oo dhaawacay hal qof oo rayid ah.
Hoggaamiye sare oo ka tirsan KDPI ayaa sheegay in ay jirto cabsi laga qabo in dagaal cusub uu ka dhex qarxo gudaha Iiraan, iyadoo kooxaha Kurdiyiinta qaarkood ay sheegayaan inay diyaar u yihiin inay gudaha u galaan dalkaasi si ay ula dagaallamaan dowladda.
Kurdiyiinta ayaa lagu qiyaasaa inay gaarayaan 25 ilaa 35 milyan oo qof, kuwaas oo ku nool dalal dhowr ah oo Bariga Dhexe ku yaalla, oo ay ka mid yihiin Turkiga, Ciraaq, Suuriya iyo Iiraan, inkastoo aysan weligood helin dowlad madax-bannaan oo rasmi ah.
