Waxaa maanta magaalada Muqdisho soo gaaray ciyaartoy heer caalami ah oo ka kala yimid dalal kala duwan, kuwaas oo ujeedkoodu yahay inay qeyb ka noqdaan dadaallada lagu horumarinayo ciyaaraha gaar ahaan kubadda cagta Soomaaliya.
Ciyaartoydan oo badankood ka yimid qaaradda Afrika ayaa lagu casuumay barnaamijyo is-dhaafsi ciyaareed, tababaro iyo kulamo saaxiibtinimo oo lala yeelanayo ciyaartoyda Soomaaliyeed. Waxaa garoonka diyaaradaha Aadan Cadde ku soo dhaweeyay mas’uuliyiin ka tirsan xiriirka kubadda cagta iyo wasaaradda dhalinyarada iyo ciyaaraha.
Mas’uuliyiinta soo dhaweynta ka qeyb galay ayaa sheegay in booqashadan tahay fursad muhiim u ah is-dhaafsiga waayo-aragnimada, kor u qaadidda xirfadda ciyaartoyda gudaha, iyo dhisidda xiriirro waara oo caalami ah.
Mudada ay joogaan Muqdisho, ciyaartoydan caalamiga ah ayaa la filayaa inay la kulmaan ciyaartoyda maxalliga ah, tababarayaal iyo taageerayaal, si ay u wadaagaan aqoon, khibrad iyo xeelado casri ah oo ciyaareed. Waxaa sidoo kale la qorsheeyay in la qabto kulan saaxiibtinimo oo dhex mara labada dhinac.
Tani waxay ka mid tahay dadaallada dowladda iyo xiriirrada ciyaaraha ay wadaan si dib loogu soo nooleeyo ciyaaraha dalka, iyadoo la xoojinayo iskaashiga caalamiga ah iyo horumarinta dhalinyarada Soomaaliyeed. Ka daawo SNTV Soo dhaweynta ciyaartoyda
