Sagaal xubnood oo ka tirsanaa wafdi dowladeed oo Soomaaliyeed oo booqasho ku joogay dalka Kosovo ayaa la la’yahay, kadib markii ay ka tageen gurigii lagu martigeliyay iyagoo aan u sheegin masuuliyiintii qaabilsanaa booqashada.
Wasaaradda Arrimaha Dibadda iyo Qurba-joogta ee Kosovo ayaa warqad diblomaasiyadeed u dirtay dowladda Soomaaliya, iyadoo ka codsanaysa inay ka caawiso helitaanka meesha ay ku sugan yihiin.
Wafdiga ayaa Kosovo gaaray 25-kii Oktoobar, waxaana hoggaaminayay Wasiirka Howlaha Guud iyo Guriyeynta, Siciid Maxamed Maxamuud, iyo Ku xigeenka Wasiirka Dekedaha, Fartuun Cabdulqaadir Faarax.
Sida lagu sheegay warqadda, sagaalka qof ayaa ka baxay guri ku yaallay tuulada Dua ee duleedka caasimadda Pristina, fiidnimadii 27-kii Oktoobar, qiyaastii 7:10 habeennimo.
Maqnaanshahooda ayaa la ogaaday maalintii xigtay, xilli masuuliyiinta Kosovo ay diyaarinayeen gaariga u qaadi lahaa garoonka diyaaradaha ee Pristina, si ay ugu laabtaan dalka.
Baaritaanno hordhac ah ayaa muujiyay in ay si ikhtiyaari ah uga tageen, ayna suurtagal tahay inay u dhaqaaqeen meel kale oo gudaha Kosovo ah. Ma aysan gaarin qeybta martida sharafta ee garoonka loogu diyaariyay.
Wasaaradda arrimaha dibadda ee Kosovo ayaa sheegtay inay isku dayday inay xog ka hesho xubnaha sare ee wafdiga, balse aysan wax natiijo ah ka helin.
Labada masuul ee wafdiga hoggaaminayay ayaa Kosovo ka dhoofay 28-kii Oktoobar.
Dowladda Kosovo ayaa muujisay walaac ay ka qabto xaaladda iyo badqabka sagaalka qof, waxayna ku baaqday in hay’adaha Soomaaliya ay mudnaan siiyaan arrinta, isla markaana si degdeg ah u wadaagaan xog kasta oo muhiim ah.
Magacyada sagaalka qof iyo ujeeddada booqashada lama shaacin.
Somaliland ayaa dhankeeda cambaareysay dhacdadan, waxayna ku eedeysay in safarrada rasmiga ah ee dowladda federaalka loo adeegsado tahriib, iyadoo tilmaantay dhacdooyin la mid ah oo hore uga dhacay Geneva, New York iyo Lyon.
