Wasaaradda Difaaca Qaranka ee Turkiga ayaa beenisay warar sheegayay in Ankara ay Soomaaliya u dirayso 15,000 oo askari, kadib codsi ka yimid dowladda federaalka.
Beeninta ayaa ka soo baxday warbixinta toddobaadlaha ah ee wasaaradda, oo Khamiistii uu hoggaaminayay afhayeenka wasaaradda, Admiral Zeki Akturk.
Wasaaraddu waxay sheegtay in wararkaas aysan ka tarjumayn xaqiiqda.
Waxay intaa ku dartay in ciidamada Turkiga ee Soomaaliya ku sugan, oo ay ku jiraan qeybta cirka, ay sii wadi doonaan tababarka iyo la talinta ciidamada Soomaaliyeed, iyo taageerada milatari ee loo fidiyo dagaalka kooxaha hubeysan.
Toddobaadkii hore, warbaahinta Soomaaliyeed ayaa sheegtay in dowladda federaalka ay saaxiibadeeda ka codsatay ciidamo dheeraad ah oo ka qeyb qaata dagaalka Al-Shabaab.
Wararkaas ayaa sheegayay in ciidamada Turkiga ay dalka imaan doonaan kahor bisha Janaayo, iyadoo la raacayo heshiiska difaaca ee labada dal.
Ilaa hadda lama hayo war rasmi ah oo dowladda federaalka ka soo saartay arrintan.
Turkiga ayaa sannadkii 2017 magaalada Muqdisho ka furay xarunta tababarka ee TURKSOM, oo ah saldhigga ugu weyn ee Turkigu ku leeyahay dibadda.
Xaruntaas waxaa lagu tababaraa saraakiil iyo askar Soomaaliyeed, oo ay ku jiraan ciidamada Gorgor.
Sannadkii 2024, labada dal ayaa saxiixay heshiis difaac iyo dhaqaale oo socon doona toban sano. Turkigu wuxuu ballanqaaday inuu ka caawiyo Soomaaliya dhisidda, tababarka iyo qalabeynta ciidamada badda.
Bishii Luulyo ee sannadkan, baarlamaanka Turkiga ayaa ilaa Luulyo 2028 u kordhiyay oggolaanshaha howlgallada milatari ee Soomaaliya, oo ay ku jiraan biyaha Soomaaliya. Go’aanka tirada ciidamada iyo waqtiga loo dirayo waxaa loo daayay Madaxweyne Recep Tayyip Erdogan.
Wasaaradda difaaca ayaa sheegtay in 30-kii Oktoobar ay laba markab dagaal u ambabaxeen Soomaaliya, si ay u geeyaan sahay, ugana beddelaan qeyb ka mid ah shaqaalaha.
Talaadadii, Safiirka Turkiga ee Soomaaliya, Ferhat Alkan, ayaa Muqdisho kula kulmay La taliyaha Amniga Qaranka, Aweys Xaaji Yuusuf Axmed, iyo Wasiirka Difaaca, Axmed Macallin Fiqi.
Kulammada ayaa diiradda lagu saaray dagaalka Al-Shabaab, amniga gobolka iyo qalabeynta ciidamada.
Wararka ku saabsan ciidamada Turkiga ayaa soo baxay xilli Uganda ay bilowday inay ciidamadeeda ka saarto Soomaaliya.
Qiyaastii 4,500 askari oo Uganda ah ayaa ka tirsan howlgalka AUSSOM, waxaana la filayaa in dhammaan ciidamada Uganda ay si tartiib tartiib ah dalka uga baxaan dhammaadka sannadka 2027.
Golaha Ammaanka ee QM ayaa la filayaa inuu 17-ka Noofembar yeesho kulan albaabadu u xiran yihiin oo looga hadlayo xaaladda Soomaaliya.
