Madaxweynaha Jamhuuriyada Federaalka Soomaaliya, Xasan Sheekh Maxamuud, ayaa sheegay in khilaafaadka siyaasadeed ee dalka lagu xallin doono wadahadal gudaha ah, isagoo diiday in arrimaha Soomaalida la dhex geliyo dalal shisheeye.
Madaxweynaha ayaa hadalkan ka sheegay magaalada Dhuusamareeb, halkaas oo uu Khamiistii uga qeyb galay xafladda caleemo saarka hoggaanka cusub ee Galmudug.
“Khilaafaadka dhexdeenna laguma xallinayo bannaanka, balse gudaheenna ayaan ku xallinaynaa,” ayuu yiri Xasan Sheekh.
Wuxuu sheegay in Soomaaliya ay ka gudubtay xilligii khilaafaadka dalka loo qaadan jiray dibadda, loona baahnaa in shisheeye uu soo dhexgalo.
Madaxweynaha ayaa xusay in khilaaf kasta la xallin karo haddii dhinacyadu ay oggolaadaan inay miiska wadahadalka fadhiistaan, oo ay si furan ugu wada hadlaan waxa ay isku hayaan.
Wuxuu dhinacyada siyaasadda ugu baaqay inay ka fogaadaan kala qeybsanaanta iyo wax kasta oo horseedi kara dhiig daata.
“Haddii aad tabasho qabtid, u tag garsoorka,” ayuu yiri, isagoo tilmaamay in khilaafaadka sharci la xiriira ay maxkamadaha yihiin meesha lagu xallinayo.
Xasan Sheekh ayaa sheegay in dowladdu ay dhawaan sameysay gole wadahadal, wuxuuna kooxaha mucaaradka ku boorriyay inay iyaguna dhistaan gole u gaar ah, si labada dhinac ay ugu diyaar garoobaan wadahadallo.
Hadallada madaxweynaha ayaa imanaya xilli muddo ay jirto khilaaf u dhexeeya dowladda federaalka iyo siyaasiyiinta mucaaradka ee ka soo horjeeda qorshaha doorashooyinka qof iyo cod.
Xafladda caleemo saarka, Xasan Sheekh wuxuu ku amaanay doorashadii Galmudug, isagoo ku tilmaamay mid si nabad ah u dhacday, muujinaysana horumarka laga sameeyay dimuqraadiyeynta dalka.
Wuxuu adkeeyay in dowladdu aysan marnaba ka tanaasuli doonin xaqa ay shacabka Soomaaliyeed u leeyihiin inay doortaan hoggaankooda.
Sidoo kale wuxuu sheegay in wada tashiga iyo is fahamka siyaasadeed ay muhiim u yihiin horumarka dalka, isla markaana dowladdu ay dhageysan doonto aragtiyada siyaasadeed ee kala duwan.
Ilaa hadda lama hayo jawaab ka timid kooxaha mucaaradka oo ku saabsan hadallada madaxweynaha.
