Wararka25: 21-02-2026 Waxaa maanta dib u furmaya shirkii u dhexeeyay Dowladda Federaalka Soomaaliya iyo Golaha Mustaqbalka, kaas oo hakad galay labadii maalmood ee lasoo dhaafay kaddib wada-tashiyo ay wadeen labada dhinac.
Shirka oo ah wejigiisii labaad ee ka dhacaya Xarunta Madaxtooyada Soomaaliya ayaa mar kale waxaa guddoominaya Madaxweyne Xasan Sheekh Maxamuud, iyadoo ay ka qayb galayaan Ra’iisul Wasaaraha iyo mas’uuliyiin kale oo ka tirsan dowladda federaalka.
Dhanka Golaha Mustaqbalka, waxaa maanta tegaya Villa Soomaaliya madaxweynihii hore Shariif Sheekh Axmed, madaxweynayaasha Jubbaland iyo Puntland, ra’iisul wasaareyaashii hore iyo xubnaha kale ee golaha.
Sida ay ilo xog-ogaal ahi sheegayaan, kulanka maanta diiradda lagu saari doono arrimaha doorashooyinka heer federaal iyo heer dowlad-goboleed, gaar ahaan xaaladda maamullada Koonfur Galbeed, Galmudug iyo HirShabelle oo muddo dhaaf ku fadhiya xafiisyada. Mucaaradka ayaa dalbanaya in la qabto doorashooyin heshiis lagu yahay, halka Dowladda Federaalka ay ku adkeysaneyso qabashada doorasho qof iyo cod ah.
Waxaa sidoo kale la filayaa in maanta la isku dayo in la kala caddeeyo nooca doorasho ee laga qabanayo maamul-goboleedyada waqtigoodu dhammaaday, arrintaas oo ah qodobka ugu weyn ee muranka dhalinaya. Labada dhinac ayaa isku afgartay in la sii wado wada-hadallada si xal looga gaaro kala aragti duwanaanshaha taagan, oo salka ku haya hanaanka doorashooyinka iyo wax-ka-beddelka dastuurka.
Shirkan ayaa ku soo aadaya xilli xasaasi ah oo dalka ay ka jiraan abaaro baahsan iyo xaalado bani’aadannimo oo saameeyay dad badan. Beesha caalamka ayaa si dhow ula socota wadahadalladan, iyadoo cadaadis saaraysa dhinacyada inay gaaraan heshiis siyaasadeed oo lagu soo afjaro is-mari-waaga jira.
Warar aan weli si rasmi ah loo xaqiijin ayaa sidoo kale sheegaya in marxaladaha dambe ee shirka lagu soo dari karo qaar ka mid ah qaybaha bulshada rayidka ah. Natiijada kasoo baxda kulamadan ayaa la filayaa inay door weyn ka qaadato jihada siyaasadeed ee dalka iyo xal u helidda khilaafaadka ragaadiyay geeddi-socodka dowlad-dhiska.
