Wararka24: Faah-faahinno dheeraad ah ayaa laga helayaa saddex weerar oo kala duwan oo xalay ka dhacay magaalada Jowhar, kuwaas oo sababay walaac amni xilli magaalada ay isku diyaarinayso doorashooyinka soo socda ee Hirshabelle.
Qaraxa ugu horreeyay ayaa ka dhacay xaafadda Horseed, gaar ahaan aagga Laanta Isnaay, waxaana lala eegtay sarkaal ka tirsan ciidamada dowladda Soomaaliya oo lagu magacaabo Haaroole. Wararka hordhaca ah ayaa sheegaya inuu dhaawac kasoo gaaray weerarkaasi.
Weerarka labaad ayaa ahaa bam-gacmeed lagu weeraray xero ay degan yihiin ciidamada Guutada 3-aad ee Ciidanka Xoogga Dalka Soomaaliyeed, taas oo ku taalla agagaarka saldhigga magaalada Jowhar. Ciidamada ku sugnaa xerada ayaa rasaas furay kadib weerarka, hase yeeshee weli lama shaacin khasaaraha rasmiga ah ee ka dhashay dhacdadaasi.
Dhanka kale, weerarka saddexaad ayaa lagu bartilmaameedsaday askari ka tirsan ciidamada ammaanka oo ku sugnaa bar-koontarool ku yaalla magaalada. Wararka ayaa sheegaya in askariga la dilay, halka kooxihii weerarka fuliyay ay la baxsadeen hubkii uu watay.
Ilaa iyo hadda ma jiro war rasmi ah oo kasoo baxay maamulka HirShabelle ama saraakiisha amniga oo ku saabsan cidda ka dambeysay weerarradan iyo khasaaraha guud ee ka dhashay.
Saaka ayaa ciidamada dowladda Federaalka Soomaaliya iyo kuwa HirShabelle waxay bilaabeen howlgallo amni oo lagu baadi-goobayo kooxihii ka dambeeyay falalkan, iyadoo la adkeeyay ammaanka magaalada.
Dhacdooyinkan ayaa kusoo aadaya xilli Jowhar ay martigelin doonto doorashooyinka guud ee HirShabelle, kuwaas oo lagu soo dooran doono xildhibaannada baarlamaanka iyo madaxweynaha cusub ee maamulka, taasoo sii kordhisay muhiimadda amniga magaalada.
