Wararka24: Wasiirka Amniga ee Hirshabeelle Maxamed Cabdiraxmaan Kheyre ayaa ka hadlay ciidamo ay Dowladda Federaalka Soomaaliya geysay magaalada Jowhar. Wuxuu sheegay in ciidamadan ay door muhiim ah ka qaadan doonaan sugidda amniga iyo xasilloonida guud ee gobolka.
Wasiirka ayaa tilmaamay in tallaabadan ay tahay dadaal wadajir ah oo u dhexeeya Dowladda Federaalka iyo Hirshabeelle. Wuxuu xusay in labada dhinac ay ka mideysan yihiin qorshaha lagu xoojinayo nabadgelyada iyo hirgelinta howlaha dowladnimo.
“Wararka lagu faafiyay baraha bulshada waa waxba kama jiraan, ciidamadu waxay u tageen howlgal lagu xaqiijinayo amniga laguna ciribtirayo kooxaha Khawaarijta,” ayuu yiri wasiirka. Hadalkan ayaa jawaab u ahaa warar si weyn u faafay saacadihii la soo dhaafay.
Muuqaallo lagu baahiyay baraha bulshada ayaa muujinayay cutubyo ka tirsan ciidanka Gorgor oo ku sii jeeda gobolka Shabeellaha Dhexe. Si kastaba, wali si rasmi ah looma shaacin ujeedka buuxa ee dhaqdhaqaaqaas.
Warar kale ayaa sheegayay in diyaarado dheeraad ah ay ciidamo ka dajiyeen Jowhar saacadihii u dambeeyay. Arrintan ayaa sii kordhisay hadal heynta la xiriirta dhaq-dhaqaaqyada militari ee ka socda magaalada.
Dowladda Federaalka Soomaaliya wali si faahfaahsan ugama hadlin ciidamadan, balse waxaa jira qorshayaal la xiriira sugidda ammaanka doorashooyin la sheegay in lagu qabanayo dowlad goboleedyada qaar. Waxaa ka mid ah Hirshabeelle, Galmudug iyo Koonfur Galbeed.
Mas’uuliyiinta Hirshabeelle ayaa adkeeyay in ujeeddada ugu weyn ay tahay xasillinta gobolka iyo ka hortagga khataraha amni. Waxay sidoo kale sheegeen in wada shaqeynta dowladda dhexe ay muhiim u tahay guusha qorshayaashan.
Xaaladda Jowhar ayaa weli si dhow loola socdaa, iyadoo indhaha lagu hayo sida ay u socdaan howlgalada iyo saameynta ay ku yeelan doonaan amniga guud ee deegaanka.
