Wararka24: Xaaladda Degmada Dayniile ee gobolka Banaadir ayaa weli kacsan, kadib xiisado culus oo labadii maalmood ee la soo dhaafay ka dhex aloosnaa ciidamada dowladda iyo dadka deegaanka.
Xiisaddan ayaa si gaar ah uga taagan xaafadda Warlaliska, halkaas oo ay isku fara saareen labada dhinac, taasoo keentay dagaal toos ah iyo gacan ka hadal sababay khasaare isugu jira dhaawacyo iyo burbur hantiyeed.
Dadka deegaanka ayaa si adag uga soo horjeestay qorshe lagu doonayo in laga barakiciyo dhulka ay degan yihiin, halka ciidamada ammaanka ay adeegsadeen awood si ay u fuliyaan howlaha la xiriira burburinta.
Wararka ayaa sheegaya in ay weli socdaan dhaq-dhaqaaqyo ciidan, halka dadka deegaanka ay wadaan abaabul ay isaga difaacayaan ciidamada, iyagoo adeegsanaya dhagaxyo iyo agab kale oo ay heli karaan.
Ilaa hadda ma jiro wax war ah oo rasmi ah oo kasoo baxay maamulka degmada ama saraakiisha amniga ee Muqdisho, taas oo sii kordhineysa walaaca laga qabo in xaaladdu kasii darto.
Xiisaddan ayaa kusoo aadeysa xilli dowladda Soomaaliya ay dhowaan burburin ka sameysay xaafado kale oo ka tirsan degmooyinka Kaaraan iyo Heliwaa, taasoo dhalisay cabashooyin ka imaanaya shacabka ku nool caasimadda.
