Wararka24: Wasiir Ku-xigeenka Wasaaradda Warfaafinta, Dhaqanka iyo Dalxiiska Soomaaliya Cabdiraxmaan Yuusuf Al-Cadaala ayaa magaalada Muqdisho kaga qeyb galay bandhig lagu soo bandhigay Barnaamijka Farshaxanka Soomaaliya ee Somalia National Pavilion.
Kulankan oo ay martigelisay Safaaradda Talyaaniga ee Soomaaliya ayaa waxaa ka qeyb galay masuuliyiin dowladeed, diblomaasiyiin, bahda dhaqanka, waxbarashada iyo farshaxamiistayaal, kuwaas oo goob joog ka ahaa bandhigga.
Bandhiggan ayaa horudhac u ah ka qeybgalka Soomaaliya ee Bandhigga Caalamiga ah ee Farshaxanka Venice Biennale, kaas oo sanadkan ka dhici doona magaalada Venice, laguna wado inuu socdo inta u dhexeysa bilaha May ilaa November 2026.
Sannadkan, Soomaaliya waxaa lagu matali doonaa saddex gabdhood oo farshaxamiistayaal ah, kuwaas oo soo bandhigi doona dhaqanka Soomaaliyeed, oo ay ku jiraan farshaxanka, fooxa iyo suugaanta.
Bandhigga Venice Biennale ayaa ah mid ka mid ah kuwa ugu waaweyn ee caalamka, waxaana ka qeyb gala in ka badan 90 dal, oo ay ku jiraan dalal Afrikaan ah, iyadoo dal kasta uu leeyahay goob u gaar ah oo uu ku soo bandhigo dhaqankiisa.
Wasiir Ku-xigeenka ayaa sheegay in ka qeybgalka bandhiggan uu Soomaaliya u yahay fursad muhiim ah oo lagu muujinayo dhaqanka iyo hal-abuurka Soomaaliyeed, isla markaana lagu gaarsiinayo caalamka.
Sidoo kale, wuxuu xusay in dowladda ay ka go’an tahay horumarinta dhaqanka iyo taageeridda fanaaniinta Soomaaliyeed si ay uga muuqdaan masraxyada caalamiga ah.
Bandhiggan ayaa muujinaya dadaallada lagu soo bandhigayo hidaha iyo dhaqanka Soomaaliyeed, iyadoo la rajeynayo inuu kor u qaado sumcadda dalka ee caalamka.
