Wararka24: Dowladda Federaalka Soomaaliya ayaa si kulul u cambaareysay tallaabo ay qaaday Israa’iil, taas oo la xiriirta magacaabista wakiil diblomaasiyadeed oo loo dirayo gobolka Somaliland.
Bayaan rasmi ah oo kasoo baxay dowladda ayaa lagu sheegay in tallaabadan ay tahay xadgudub toos ah oo ka dhan ah madaxbannaanida, midnimada iyo wadajirka dhuleed ee Soomaaliya, isla markaana ay ka hor imaaneyso sharciga caalamiga ah.
Dowladdu waxay xustay in tallaabadaasi ay si cad uga hor imaaneyso qawaaniinta Qaramada Midoobay iyo mabaa’di’da Midowga Afrika, kuwaas oo aqoonsan Soomaaliya inay tahay dal mideysan oo leh xuduudo caalami ah oo la wada oggol yahay.
Sidoo kale, dowladda Federaalka ayaa si cad u sheegtay inay gebi ahaanba diidan tahay isku day kasta oo lagu doonayo in aqoonsi siyaasadeed ama diblomaasiyadeed la siiyo qayb ka mid ah dhulkeeda iyadoo aan oggolaansho ka haysan dowladda dhexe.
Bayaanaka ayaa lagu adkeeyay in Somaliland ay tahay qayb ka mid ah Soomaaliya, isla markaana dadaal kasta oo lagu muujinayo inay tahay dal gooni ah uu yahay mid aan sharciyad lahayn, isla markaana wax u dhimaya heshiisyada caalamiga ah.
Dowladda Soomaaliya ayaa sidoo kale ugu baaqday Israa’iil inay dib uga laabato go’aankan, isla markaana ay ixtiraamto madaxbannaanida iyo midnimada dhuleed ee Soomaaliya.
Dhanka kale, Soomaaliya waxay ugu baaqday beesha caalamka, oo ay ku jiraan Ururka Iskaashiga Islaamka, Midowga Yurub iyo Jaamacadda Carabta, inay ilaaliyaan sharciga caalamiga ah kana hortagaan tallaabo kasta oo dhaawacaysa midnimada dalka.
Ugu dambeyn, Dowladda Federaalka Soomaaliya ayaa caddeysay inay ka go’an tahay difaaca midnimada iyo xuquuqdeeda qaran iyadoo adeegsaneysa dhammaan waddooyinka diblomaasiyadeed, siyaasadeed iyo sharci ee suuragalka ah.
