Wararka24: 6-02-2026: Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa la filayaa inuu maalmaha soo socda booqasho rasmi ah ku tago magaalada Qaahira ee dalka Masar, halkaas oo uu kulammo kula yeelan doono hoggaamiyeyaasha Masar iyo Boqortooyada Sacuudiga, sida ay sheegeen ilo diblomaasiyadeed.
Safarka Madaxweynaha ayaa imanaya kaddib kulammo horudhac ah oo Wasiirka Arrimaha Dibadda Soomaaliya ku yeeshay Qaahira, kuwaas oo diiradda lagu saaray arrimaha amniga iyo dhowrista madax-bannaanida dhuleed ee Jamhuuriyadda Federaalka Soomaaliya. Ilo-wareedyo ayaa sheegay in wada-hadalladaas ay sidoo kale ku lug leeyihiin doorka Sacuudiga ee xasilinta Geeska Afrika.
Dowladda Sacuudiga ayaa, sida ay sheegeen ilo diblomaasiyadeed, door muhiim ah ka qaadaneysa wada-hadalladan, kuwaas oo ujeedkoodu yahay xoojinta iskaashiga dhinacyada amniga iyo difaaca, iyo sugidda amniga marinka istaraatiijiga ah ee Gacanka Cadmeed. Isku soo dhowaanshaha saddexda dal ayaa la filayaa inuu gogol xaaro u noqdo heshiisyo cusub oo kor u qaadaya awoodda ciidanka qaranka Soomaaliyeed.
Arrimahan ayaa kusoo aadaya xilli ay jiraan isbeddello diblomaasiyadeed oo saameyn ku leh gobolka, kaddib markii dabayaaqadii bishii December ay Israa’iil ku dhawaaqday tallaabo ay ku sheegtay aqoonsi la xiriira Somaliland, taas oo si adag uga hor timid Dowladda Federaalka Soomaaliya iyo dalal kale oo badan.
Dowladda Federaalka ayaa ku tilmaantay tallaabadaas xadgudub ka dhan ah madax-bannaanida iyo midnimada dhuleed ee Soomaaliya, waxayna sheegtay inay jawaab ka bixin doonto iyadoo adeegsanaysa marinnada diblomaasiyadeed, kuwa siyaasadeed iyo sharciga caalamiga ah.
Bayaan kasoo baxay dowladda Mareykanka ayaa sidoo kale muujiyay in Washington ay taageerayso mowqifka Muqdisho iyo ururrada waaweyn ee gobolka ee muddada dheer ku adkaysanayay ilaalinta xuduudaha caalamiga ah ee Soomaaliya.
Dhanka kale, isbahaysi ballaaran oo ka kooban dalal iyo ururro Carbeed, Islaam iyo Afrikaan ah ayaa soo saaray war-murtiyeed wadajir ah oo ay ku diiddan yihiin tallaabo kasta oo wiiqaysa midnimada Soomaaliya, iyagoo ka digay cawaaqib halis ah oo ka dhalan kara xiisad kasta oo ku soo kororta Geeska Afrika iyo gobolka Badda Cas.
Wararka muhimka ah kalasoco WARARKA24
