Wararka24: Dhaqdhaqaaqa Xamaas ayaa ku dhawaaqay inuu kala diray maamulkiisii rayidka ahaa ee Marinka Qasa, isagoo sheegay in maamulka arrimaha rayidka lagu wareejin doono guddi farsamo oo ay taageerayaan Qaramada Midoobay. Tallaabadan ayaa qayb ka ah heshiiska xabbad-joojinta ee ay dhexdhexaadinayeen Mareykanka iyo dhinacyo kale.
Mas’uul ka tirsan Xamaas ayaa sheegay in shaqaalaha bixiya adeegyada dadweynaha iyo hawlaha farsamada ay sii wadi doonaan shaqadooda, balse ay hoos iman doonaan Guddiga Qaranka ee Maamulka Qasa. Guddigan ayaa si ku meel gaar ah u maamuli doona adeegyada rayidka iyo howlaha maamulka.
Xamaas ayaa sheegtay in go’aankan uu muujinayo sida ay uga go’an tahay dib u dhiska Qasa iyo hirgelinta heshiiska xabbad-joojinta. Si kastaba ha ahaatee, dhaqdhaqaaqu ma uusan caddeyn inuu hubka dhigayo ama maamulka amniga ku wareejinayo ciidan caalami ah, taas oo weli ah qodobka ugu weyn ee ay isku mari la’yihiin dhinacyada wada-hadallada ku jira.
Hay’adda loo xilsaaray kormeerka heshiiska iyo dib u dhiska Qasa ayaa sheegtay inay tallaabada Xamaas ku qiimeyn doonto ficillada ka dhasha, halkii ay ku saleyn lahayd ballanqaadyo. Waxay sidoo kale carrabka ku adkeysay in guddiga cusub uu si buuxda ula wareego maamulka rayidka, iyadoo arrimaha hub ka dhigista ay weli yihiin qayb muhiim ah oo heshiiska ka mid ah.
Dhanka kale, dowladda Israa’iil ayaa sheegtay in tallaabada Xamaas aysan waxba ka beddeleyn mowqifkeeda ku aaddan hub ka dhigista kooxda. Wasiirka Arrimaha Dibadda Israa’iil ayaa sheegay in maamul kasta oo rayid ah uusan si madax-bannaan u shaqeyn karin haddii Xamaas ay sii haysato awooddeeda militari.
Guddiga farsamada ee loo qorsheeyay inuu la wareego maamulka rayidka ayaa xaruntiisu tahay Qaahira, waxaana loo xilsaaray dib u soo celinta adeegyada aasaasiga ah iyo maamulka arrimaha bulshada iyadoo la kaashanayo Qaramada Midoobay. Inkasta oo heshiiska xabbad-joojinta uu dhaqan galay bilo kahor, haddana wada-hadallada u dhexeeya Israa’iil iyo Xamaas ayaa weli hakad ku jira sababo la xiriira muranka ka taagan hub ka dhigista iyo qorshaha dib u dhiska Qasa.
