Muqdisho – Wararka24: Wasiirka Wasaaradda Caafimaadka iyo Daryeelka Bulshada ee Soomaaliya, Dr. Cali Xaaji Aadan, ayaa caawa xilka ka qaaday Agaasimihii Hore Isbitaalka Hooyada iyo Dhallaanka ee Banaadir Dr. Fartuun Shariif, kaddib dhacdadii murugada lahayd ee Gabadh Soomaaliyeed ay ku umushay iridda hore ee isbitaalkaas xili laga ciliyey albaabka.
Wareegto kasoo baxday xafiiska Wasiirka ayaa manta lagu magacaabay Cabdirisaaq Shariif Cali inuu noqdo Agaasimaha Guud ee Isbitaalka Hooyada iyo Dhallaanka ee Banaadir, isagoo beddelaya Dr. Fartuun Shariif, oo xilkaasi haysay muddo sanad ah.
Isbeddelkan ayaa yimid saacado kadib markii Wasiirka Caafimaadka uu kormeer degdeg ah ku tagay Isbitaalka Banaadir, halkaas oo uu si toos ah uga waraystay maamulka, dhakhaatiirta iyo shaqaalaha ku sugnaa 26-kii Oktoobar — xilligii ay dhacdadu dhacday.
Dr. Cali Xaaji Aadan ayaa sheegay in natiijadii hordhaca ahayd ee baaritaanka ay muujisay dayacaad ka timid dhinaca maamulka iyo shaqaalaha, taasoo sababtay in haweeney uur leh lagu diido adeeg caafimaad oo degdeg ah. Wuxuu ku tilmaamay dhacdadaas “mid aan la aqbali karin” maadaama adeegga caafimaad ee degdegga ahi yahay xuquuq aasaasi ah oo muwaadiniinta ay xaq u leeyihiin.
“Waxaan aad uga xunahay dhacdadaasi murugada leh, waxaanan shacabka Soomaaliyeed ka raaligelinayaa in arrin noocaas ah ay ka dhacdo isbitaal dowladeed oo hooyooyinka iyo dhallaanka loogu talagalay,” ayuu yiri Wasiirka.
Wasiirka ayaa intaas ku daray in isbeddelka maamulka uu qayb ka yahay qorshe ballaaran oo lagu hagaajinayo hufnaanta iyo daryeelka caafimaadka hooyada iyo dhallaanka Soomaaliyeed. Wuxuu sidoo kale sheegay in shaqaalaha ku jiray habeenkii ay dhacdadu dhacday shaqada laga joojin doono inta baaritaanku socdo.
Dr. Cali Xaaji Aadan ayaa faray Agaasimaha cusub inuu shaqada u guto si masuuliyad iyo hufnaan ku dhisan, isagoo ballan qaaday in Wasaaraddu ay qaadi doonto tallaabooyin sharci iyo maamul oo ka dhan ah cid kasta oo lagu helo dayacaad ama ku tagrifal shaqo.
“Badbaadada hooyada iyo dhallaanka waa mudnaanta koowaad ee Wasaaradda Caafimaadka, cidna looma oggolaan doono in ay halis geliso nolosha shacabka,” ayuu raaciyay Wasiirka.
