Wararka24: Wasiirka Gaashaandhigga Dowladda Federaalka Soomaaliya, Axmed Macallin Fiqi ayaa hanjabaad adag u jeediyay kooxaha mucaaradka ee ku mideysan Golaha Mustaqbalka Soomaaliya, xilli uu cirka isku sii shareerayo khilaafka siyaasadeed ee ka taagan dalka.
Wasiir Fiqi ayaa sheegay in dowladda aysan qorsheyn weerar ka dhan ah mucaaradka, balse wuxuu si cad uga digay cid kasta oo isku dayda inay lasoo baxdo maliishiyaad hubeysan ama ay qalqal geliso amniga magaalada Muqdisho.
“Wax idiin soo weeraraya ma jiraan, laakiin maliishiyaad maalinkaad qaadataan gacmahaa la idinka jabinayaa,” ayuu yiri wasiirka oo hadal ka jeediyay munaasabad lagu qabtay Muqdisho.
Sidoo kale, wuxuu sheegay in hadalkiisa uu la xiriiray dhacdo hore oo uu ku eedeeyay xubno mucaarad ah inay weerar ku qaadeen saldhigga degmada Wardhiigley sanadkii hore, isaga oo xusay in dowladda xilligaas ay ka gaabsatay inay jawaab adag bixiso si looga fogaado xaalad sii xumaata.
Wasiirka ayaa dhanka kale ku eedeeyay mucaaradka inay bulshada ku marin habaabinayaan hadallo siyaasadeed iyo abaabulo aan taageero badan helin, isagoo tilmaamay in bannaanbax ay mucaaradku ku baaqeen 15-kii May uusan helin taageeradii ay filayeen.
Dhanka kale, Golaha Mustaqbalka Soomaaliya ayaa si kulul uga jawaabay hadallada wasiirka, waxayna ku tilmaameen kuwo halis ku ah xasilloonida dalka iyo xuquuqda siyaasadeed ee mucaaradka.
Golaha ayaa warsaxaafadeed uu soo saaray ku sheegay in hadallada Wasiir Fiqi aysan ahayn aragti shaqsiyeed, balse ay ka tarjumayaan qorshe siyaasadeed oo ay sheegeen inuu hoggaaminayo Madaxweyne Xasan Sheekh Maxamuud.
Waxay sidoo kale ugu baaqeen ciidamada qalabka sida inay ilaaliyaan dastuurka iyo badqabka shacabka Soomaaliyeed, kana fogaadaan ku milanka khilaafaadka siyaasadeed ee dalka.
Xiisadda u dhexeysa dowladda iyo mucaaradka ayaa sii xoogeysaneysa, iyadoo ay socdaan dadaallo siyaasadeed iyo waan-waan lagu doonayo in xal looga gaaro muranka ka dhashay muddo xileedka dowladda federaalka iyo hannaanka kala guurka siyaasadeed ee dalka.
