Wararka24: Ugu yaraan laba qof ayaa ku dhintay, lix kalena way ku dhaawacmeen weerar ballaaran oo diyaaradaha aan duuliyaha lahayn ah oo Ukraine ay ku qaaday gobolka Moscow, sida ay sheegeen mas’uuliyiinta Ruushka.
Barasaabka gobolka Moscow, Andrei Vorobyev, ayaa sheegay in boqolaal drone ah la soo riday, iyadoo weerarku waxyeello u geystay guryo iyo dhismayaal kale. Haweeney 44 jir ah ayaa ku dhimatay Sofyino, halka nin waayeel ah uu ku dhintay Orekhovo-Zuevo.
Duqa Moscow, Sergei Sobyanin, ayaa sheegay in 450 drone oo ku wajahnaa caasimadda la soo riday, iyadoo qayb ka mid ah goob lagu sifeeyo shidaalka ay waxyeello soo gaartay. Weerarku wuxuu sidoo kale sababay in si ku-meel-gaar ah loo xaddido duulimaadyada garoomada Sheremetyevo iyo Vnukovo.
Dhanka Ukraine, mas’uuliyiinta gobolka Kyiv ayaa sheegay in weerarro Ruushku geystay ay ku dhinteen afar qof, oo ay ku jiraan saddex carruur ah. Labada dhinac ayaa toddobaadyadii u dambeeyay kordhiyay weerarrada ay isku qaadaan, gaar ahaan kuwa lagu beegsanayo kaabayaasha tamarta iyo gaadiidka.
