Wararka24: Madaxweynaha Mareykanka, Donald Trump, ayaa sheegay in ay dhammaatay xabbad-joojintii iyo is-afgaradkii u dhexeeyay Mareykanka iyo Iran, kadib markii labada dhinac ay is-weydaarsadeen duqeymo culus saacadihii la soo dhaafay.
Trump ayaa hadalkan jeediyay isagoo la hadlayay warbaahinta intii uu kulan la lahaa Xoghayaha Guud ee NATO. Markii la weydiiyay xaaladda xabbad-joojinta, wuxuu sheegay inuu aaminsan yahay in heshiiskii u dhexeeyay labada dhinac uu soo afjarmay.
Madaxweynaha Mareykanka ayaa sidoo kale sheegay inuusan doonayn inuu sii wado wada-xaajoodyo uu la galo Iran, isagoo ku eedeeyay dowladda Tehran inay lumisay kalsoonidii loo baahnaa si loo sii wado wada-hadallada. Wuxuu intaas ku daray in wada-xaajoodyo dambe ay noqon karaan waqti lumis, sida uu hadalka u dhigay.
Dhanka kale, Dowladda Iran ayaa ku dhawaaqday inay ballaarinayso weerarrada ka dhanka ah saldhigyada Mareykanka ee ku yaalla Bariga Dhexe. War-saxaafadeed kasoo baxay Ciidanka Ilaalada Kacaanka Iran ayaa lagu sheegay in Mareykanka uu mas’uul ka noqon doono cawaaqibka ka dhasha duqeymaha uu ka fuliyay gudaha Iran, sida ay baahisay Al Jazeera.
Wararka ayaa sidoo kale sheegaya in diyaarad sidday Madaxweynaha Iran, Masoud Pezeshkian, ay si degdeg ah uga duushay magaalada Najaf ee dalka Ciraaq kuna laabatay Iran, xilli ay sii xoogeysanayeen weerarrada militari ee u dhexeeya labada dhinac.
Xiisaddan ayaa noqotay mid sii kordheysa, iyadoo labada dal ay is-weydaarsanayaan weerarro la sheegay inay yihiin kuwii ugu xooganaa tan iyo markii la gaaray heshiiskii xabbad-joojinta. Ilaa hadda ma jiro war rasmi ah oo muujinaya in dadaallo diblomaasiyadeed oo cusub lagu soo celinayo wada-hadallada ama lagu dejinayo xiisadda sii xoogeysaneysa.
DAAWO
