Muqdisho – Taliyaha cusub ee Ciidanka Mareykanka ee Afrika (AFRICOM), General Dagvin R.M. Anderson, ayaa sheegay in Soomaaliya ay tahay goob istiraatiiji ah oo muhiim u ah ammaanka caalamka, isla markaana ay ka jiraan fursado badan oo horumarineed inkastoo ay weli socdaan caqabado dhinaca amniga ah.
General Anderson oo wareysi siiyay Telefishinka Qaranka ayaa xusay in safarkiisa uu salka ku hayo qiimeyn ku saabsan xaaladda guud ee Soomaaliya iyo gobolka, isagoo tilmaamay in Mareykanku diyaar u yahay inuu sii xoojiyo taageerada dhinaca amniga iyo dhismaha dowladnimada.
Wuxuu carrabka ku adkeeyay in Soomaaliya ay ku taallo isgoys muhiim ah oo istiraatiiji ah, taas oo ka dhigaysa meel ay dunida oo dhan danaynayso, maadaama ay fursado waaweyn ka jiraan dhinacyada iskaashiga siyaasadeed, amniga iyo horumarinta bulshada.
Hadalkan ayaa imanaya xilli ay socdaan dadaallo xooggan oo lagu xoojinayo iskaashiga Soomaaliya iyo Mareykanka, gaar ahaan dhinacyada la dagaallanka argagixisada iyo taageerada hay’adaha amniga si loo xaqiijiyo xasillooni waarta oo dalka ka hanaqaadda.
