Wararka24: Dowladda Federaalka Soomaaliya ayaa maanta dalka dib ugu soo celisay 174 dhalinyaro Soomaaliyeed oo tahriibayaal ahaa, kuwaas oo laga soo saaray xabsiyo ku yaalla dalka Liibiya. Howlgalkan ayaa waxaa iska kaashaday dowladda Soomaaliya, International Organization for Migration iyo European Union.
Dhalinyaradan ayaa lagu soo dhaweeyay Garoonka Aadan Cadde ee magaalada Muqdisho, iyadoo ay halkaas ku sugnaayeen masuuliyiin uu hoggaaminayo Xasan Maxamed Cali, Wasiir ku-xigeenka Wasaaradda Arrimaha Dibadda iyo Iskaashiga Caalamiga ah.
Masuuliyiinta ayaa sheegay in dadka la soo celiyay ay soo mareen xaalado adag oo dhinaca bani’aadantinimada ah, oo ay ka mid yihiin xabsi, jirdil iyo nolol aad u liidata intii ay ku sugnaayeen Liibiya. Arrintan ayaa muujineysa halista ay wajahaan tahriibayaasha Soomaaliyeed ee isku dayaya inay gaaraan dalalka Yurub.
Markii ay yimaadeen Muqdisho, dadkaasi waxaa si degdeg ah loo siiyay gargaar bani’aadantinimo oo ay ka mid yihiin daryeel caafimaad, hoy ku meel gaar ah iyo taageero nafsiyeed. Dowladda iyo hay’adaha la shaqeynaya ayaa sidoo kale diyaarinaya barnaamijyo dib u dhexgal bulsho ah, si ay noloshooda dib ugu bilaabaan.
Tallaabadan ayaa qeyb ka ah dadaallada socda ee lagu badbaadinayo muwaadiniinta Soomaaliyeed ee ku xayiran dalalka kale, gaar ahaan kuwa wajahaya xaalado adag oo tahriib iyo tacaddi la xiriira. Dowladda ayaa sidoo kale ku boorrisay dhalinyarada inay ka fogaadaan tahriibka halista ah, ayna ka faa’iideystaan fursadaha ka jira gudaha dalka.
Ugu dambeyn, mas’uuliyiintu waxay xuseen in howlahan dib u celinta ah ay sii socon doonaan, iyadoo la xoojinayo iskaashiga caalamiga ah si loo yareeyo dhibaatada tahriibka iyo cawaaqibkiisa.
