Wararka24: Dowladda Federaalka Soomaaliya iyo Dowladda Talyaaniga ayaa magaalada Muqdisho ku kala saxiixday heshiis is-afgarad oo lagu xoojinayo iskaashiga dhinaca tababarka ciidamada booliska, iyadoo labada dhinac ay ku tilmaameen tallaabo muhiim u ah horumarinta hay’adaha amniga iyo fulinta sharciga.
Heshiiska ayaa waxaa kala saxiixday Wasiirka Amniga Gudaha Soomaaliya Cabdullaahi Sheekh Ismaaciil Fartaag iyo Wasiirka Arrimaha Gudaha Talyaaniga Matteo Piantedosi, oo booqasho rasmi ah ku jooga magaalada Muqdisho.
Sida lagu sheegay war-murtiyeedka wadajirka ah, heshiiska ayaa dhigaya hannaan iskaashi oo xoogga saaraya tababarrada aqooneed iyo kuwa xirfadeed ee ciidamada booliska, diyaarinta macallimiinta bixiya tababarrada, is-weydaarsiga khibradaha iyo booqashooyinka waxbarasho.
Qodobada heshiiska ayaa sidoo kale ka kooban qabanqaabinta shirar, siminaarro, aqoon-is-weydaarsiyo iyo tababaro heer sare ah oo lagu kobcinayo aqoonta iyo xirfadaha ciidamada booliska ee labada dal.
Labada dowladood ayaa ku heshiiyay in la sameeyo guddi wadajir ah oo maamula hirgelinta heshiiska, qiimeeya heerka uu marayo iskaashiga isla markaana qorsheeya wejiyada xiga ee wada-shaqeynta. Guddigaasi ayaa ka koobnaan doona wakiillo ay soo magacaabaan hay’adaha ay khuseyso ee labada dhinac.
War-murtiyeedka ayaa xusay in dhammaan hawlaha la xiriira iskaashiga ay waafaqsan yihiin shuruucda gudaha ee Soomaaliya iyo Talyaaniga, xeerarka caalamiga ah iyo waajibaadka ka saaran dowladda Talyaaniga ee xubinnimada Midowga Yurub.
Sidoo kale, heshiiska ayaa lagu adkeeyay ilaalinta xuquuqda aadanaha iyo dhowrista xogta shakhsiga ah inta lagu guda jiro fulinta barnaamijyada iskaashiga. Waxaa lagu heshiiyay in heshiisku dhaqan geli doono muddo shan sano ah, iyadoo dib loo cusboonaysiin karo marka muddadaasi dhammaato.
Saxiixa heshiiskan ayaa kusoo aadaya xilli Soomaaliya iyo Talyaanigu ay sii xoojinayaan xiriirkooda dhinacyada amniga, horumarinta hay’adaha dowladda iyo dhismaha awoodda ciidamada ammaanka.
