Wararka24: Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaam Cabdi Cali, ayaa kulan la yeeshay Wasiirka Qorsheynta Dhaqaalaha iyo Horumarinta ee Eswatini, Dr. Thambo Gina, intii uu socday shirka Wasiirrada Arrimaha Dibadda ee Kuuriya iyo Afrika ee lagu qabtay magalada Seoul.
Kulanka labada mas’uul ayaa diiradda lagu saaray xoojinta xiriirka laba geesoodka ah iyo horumarinta iskaashiga ka dhexeeya Soomaaliya iyo Eswatini, iyadoo labada dhinac ay ka wada hadleen fursadaha lagu ballaarin karo wada-shaqeynta dhinacyada muhiimka ah.
Dr. Thambo Gina ayaa mar kale xaqiijiyay taageerada joogtada ah ee Eswatini u hayso madaxbannaanida, midnimada iyo wadajirka dhuleed ee Jamhuuriyadda Federaalka Soomaaliya, isagoo adkeeyay muhiimadda ay leedahay ilaalinta qiyamka dowladnimada iyo madax-bannaanida dalalka Afrika.
Labada wasiir ayaa sidoo kale muujiyay sida ay uga go’an tahay xoojinta midnimada Afrika, kobcinta iskaashiga qaaradda iyo horumarinta xiriirrada ku dhisan is-ixtiraam, wadajir iyo danaha guud ee ay wadaagaan labada dal.
Kulankan ayaa qeyb ka ah dadaallada Soomaaliya ay ku ballaarinayso xiriirrada diblomaasiyadeed iyo iskaashiga ay la leedahay dalalka Afrika, si loo xoojiyo wada-shaqeynta dhinacyada siyaasadda, dhaqaalaha iyo horumarinta.
