Wararka24: Maxkamada federaalka Mareykanka ayaa dacwad kusoo oogtay Shamso Axmed Xasan oo 55 jir ah iyo Xanaan Mursal Yuusuf oo 25 jir ah, kuwaas oo lagu eedeeyay khiyaano maaliyadeed oo gaareysa 21.2 milyan oo dollar, kuna saabsan barnaamijka caafimaadka Medicaid ee gobolka Minnesota.
Labadan haween ayaa deggen magaalada Brooklyn Park ee gobolka Minnesota, waxaana lagu sheegay inay gudbiyeen sheegashooyin been abuur ah oo la xiriira adeegyada daryeelka carruurta qaba autism-ka ee hoos yimaada barnaamijka EIDBI. Sida lagu sheegay dukumenti kasoo baxay Waaxda Caddaaladda Mareykanka, sheegashooyinka la gudbiyay ayaa guud ahaan gaarayay 46.6 milyan oo dollar.
Xeer ilaaliyeyaasha ayaa sheegay in lacag dhan 21.2 milyan oo dollar si toos ah loo siiyay, iyadoo la tuhunsan yahay in lacagahaasi loo adeegsaday iibka guryo, dhulal iyo xawaalado loo diray dalka Kenya.
Dacwadda ayaa sidoo kale sheegtay in qoysas badan loo ballanqaaday lacago u dhaxeysa 300 ilaa 1,500 dollar bishii si carruurtooda loogu diiwaangeliyo qorshahaasi, inkastoo aan la bixin adeegyo caafimaad oo dhab ah.
Shamso iyo Xanaan ayaa kamid ah 15 qof oo lagu eedeeyay inay ku lug lahaayeen qorshe musuq maasuq oo lagu tilmaamay kii ugu weynaa ee abid la xiriira adeegyada autism-ka ee Medicaid, kaas oo sababay khasaare ka badan 90 milyan oo dollar.
Mas’uuliyiinta gobolka Minnesota ayaa sheegay in xarumo badan oo lagu magacaabay adeeg bixiyeyaal aysan lahayn shaqaale aqoon u leh adeegyada caafimaadka, halka qaar kamid ah xarumahaasi lagu tilmaamay kuwo aan si dhab ah u shaqeyneynin.
Baaritaanka kiiskan ayaa socday tan iyo sanadkii 2024, waxaana bishii Febraayo ee sanadkan dowladda federaalka Mareykanka ay si ku meel gaar ah u hakisay qaar kamid ah lacagihii Medicaid ee gobolka Minnesota, si loo baaro eedeymaha musuq maasuqa.
Fadeexaddan ayaa si weyn usoo shaac baxday kadib markii wariye madax bannaan oo lagu magacaabo Nick Shirley uu baahiyay muuqaallo muujinaya xarumo la sheegay inay lacago badan qaadanayeen balse aan bixin adeegyo muuqda.
