Wararka24: Safaaradda Soomaaliya ee Koonfur Afrika ayaa digniin amni u dirtay jaaliyadda Soomaaliyeed ee ku nool dalkaasi, iyadoo ka digtay suurtagalnimada bannaan-baxyo iyo rabshado laga cabsi qabo inay ka dhacaan qaybo kamid ah dalka.
Qoraal kasoo baxay safaaradda ayaa lagu booriyay muwaadiniinta Soomaaliyeed inay muujiyaan feejignaan dheeri ah, kana fogaadaan goobaha ay ka jiraan khataraha amni iyo isu imaatinnada laga yaabo inay isku beddelaan rabshado.
Digniinta ayaa si gaar ah u taabaneysa ganacsatada Soomaaliyeed, kuwaas oo lagula taliyay inay taxaddar dheeri ah muujiyaan, isla markaana ay qiimeeyaan xaaladaha amni ee deegaannada ay ka howlgalaan si loo ilaaliyo naftooda iyo hantidooda.
Safaaradda ayaa sidoo kale ku boorrisay bulshada Soomaaliyeed inay si dhow ula socdaan wararka iyo tilmaamaha ay soo saarayaan hay’adaha ammaanka ee Koonfur Afrika, ayna u hoggaansamaan awaamiirta rasmiga ah ee la xiriira badqabka shacabka.
Waxaa kale oo la adkeeyay muhiimadda wadajirka bulshada iyo iska warqabka, iyadoo jaaliyadda Soomaaliyeed lagu dhiirrigeliyay inay is taageeraan, xogaha muhiimka ahna ay wadaagaan xilliyada ay jiraan xaaladaha amni ee aan la hubin.
Digniintan ayaa kusoo aadeysa xilli ay mararka qaar ka dhacaan qaybo kamid ah Koonfur Afrika dibadbaxyo iyo rabshado saameyn ku yeesha ganacsiyada iyo dhaqdhaqaaqa bulshada, taas oo keentay in safaaraddu ku baaqdo taxaddar iyo feejignaan dheeraad ah.
