Wararka24: Wasiirka Arrimaha Gudaha ee Dowladda Federaalka Soomaaliya Cali Yuusuf (Cali Xoosh) ayaa booqasho rasmi ah ku jooga dalka Algeria, halkaas oo uu kulan kula yeeshay dhiggiisa dalkaasi Saciid Sacyuud iyo masuuliyiin kale oo ka tirsan dowladda Algeria.
Kulanka ayaa waxaa sidoo kale ka qeyb-galay Taliyaha Guud ee Amniga Qaranka Algeria Badaawi, Safiirka cusub ee Algeria usoo magacowday SoomaaliyaMaxamed Calim iyo Safiirka Soomaaliya ee Algeria Yuusuf Axmed Xasan ( Yusuf Jeego).
Wadahadallada labada dhinac ayaa diiradda lagu saaray xoojinta xiriirka laba geesoodka ah iyo kor u qaadista iskaashiga dhinacyada amniga iyo la dagaallanka argagixisada. Waxaa sidoo kale laga hadlay arrimaha dib-u-heshiisiinta, xasilloonida siyaasadeed iyo taageerada dowlad dhiska Soomaaliya.
Labada wasiir ayaa muujiyay sida ay uga go’an tahay xoojinta wada shaqeynta labada dowladood, gaar ahaan dhinacyada horumarinta hay’adaha dowladda iyo maamulka heer deegaan. Waxay sidoo kale ka wada hadleen sidii loo kordhin lahaa is weydaarsiga khibradaha iyo tababarrada la xiriira amniga iyo maamulka.
Dowladaha Soomaaliya iyo Algeria ayaa leh xiriir diblomaasiyadeed oo soo jireen ah, iyadoo Algeria ay kamid tahay dalalka taageera dadaallada nabadda iyo xasilinta Soomaaliya. Kulankan ayaa loo arkaa mid sare u qaadaya xiriirka labada dal iyo iskaashiga gobolka.
Booqashada Wasiir Cali Xoosh ayaa kusoo aadeysa xilli dowladda Soomaaliya ay waddo dadaallo lagu xoojinayo xiriirka caalamiga ah iyo iskaashiga amniga si loo taageero xasilloonida iyo dib u dhiska dalka.
