Wararka24: Shirkadda Soma Oil and Gas Ltd. ayaa wada dadaallo cusub oo ay ku raadineyso shirkado Mareykan ah oo ay iskaashi la sameyso, xilli xiisaha caalamiga ah ee shidaalka badda Soomaaliya uu mar kale dib u soo laabtay.
Soma Oil and Gas ayaa la sheegay inay diyaar u tahay inay qayb ka mid ah saamigeeda hawlgalka ku wareejiso shirkado leh awood dhaqaale iyo farsamo, si loo dardargeliyo sahminta shidaalka ee xeebaha Soomaaliya. Qorshahan ayaa loo yaqaan “farm-out”, oo ah hannaan shirkadaha shidaalka ay ku wadaagaan khataraha iyo maalgelinta.
Shirkaddu waxay sheegtay inay gacanta ku hayso blocks-ka 129, 130 iyo 192 ee badda Soomaaliya, kuwaas oo daboolaya dhul-badeed ballaaran oo lagu qiyaasay in uu ka badan yahay 10,000 km², laguna tuhunsan yahay kayd shidaal oo weyn.
Dhaqdhaqaaqan cusub ayaa kusoo aadaya xilli Soomaaliya ay dib u howlgelisay qorshaheedii shidaalka kadib tobanaan sano oo colaado iyo xasillooni darro ay hakad geliyeen sahminta kheyraadka dabiiciga ah.
Sidoo kale, Turkey ayaa dhawaan bilowday qodistii ugu horreysay ee shidaalka oo ka baxsan dalkeeda, kadib markii markabka Cagri Bey uu gaaray xeebaha Muqdisho bishii April 2026.
Khubarada ayaa sheegaya in Soomaaliya ay leedahay fursad weyn oo dhaqaale haddii shidaal ganacsi la helo, balse ay weli jiraan caqabado waaweyn oo ay kamid yihiin amniga, sharciyada iyo hufnaanta heshiisyada lala galayo shirkadaha shisheeye.
Magaca Soma Oil and Gas ayaa hore muran u galay kadib baaritaan uu sameeyay Serious Fraud Office sanadkii 2015, inkastoo baaritaankaas la xiray 2016 iyadoo aan wax dacwad ah lagu soo oogin.
Tallaabadan cusub ayaa muujineysa in tartanka loogu jiro shidaalka Soomaaliya uu sii xoogeysanayo, iyadoo shirkado badan oo caalami ah ay dib u eegayaan fursadaha ka jira xeebaha dalka.
