Wararka25: 22-02-2026 Waxaa maanta mar kale Xarunta Villa Soomaaliya ka furmay kulan labaad oo u dhexeeya Madaxweynaha Jamhuuriyadda Federaalka Soomaaliya, Xasan Sheekh Maxamuud, iyo Golaha Mustaqbalka Soomaaliyeed, kaas oo looga hadlayo xaaladda siyaasadeed ee dalka.
Kulanka oo ah mid xasaasi ah, isla markaana dib u dhacay laba jeer oo hore, ayaa waxaa guddoominaya Madaxweyne Xasan Sheekh Maxamuud. Waxaa sidoo kale goobjoog ah Ra’iisul Wasaaraha Soomaaliya Xamza Cabdi Barre, Agaasimaha Hay’adda NISA, iyo xubno ka tirsan Golaha Wasiirrada Xukuumadda Federaalka.
Dhinaca Golaha Mustaqbalka, shirka waxaa ka qeyb-galaya xubnaha Madasha Samatabixinta iyo madaxweynayaasha maamul-goboleedyada Jubbaland iyo Puntland, kuwaas oo goordhow gaaray Xarunta Madaxtooyada Qaranka, halkaas oo si rasmi ah loogu soo dhaweeyay.
Labada dhinac ayaa maalmahan waday wada-tashiyo gaar gaar ah oo ku aaddan qaabka wada-hadallada, iyadoo Golaha Mustaqbalka ka laabtay go’aankii ay hore ugu diideen in ay si toos ah ula fariistaan dowladda. Golaha ayaa sidoo kale meesha ka saaray guddigii gaarka ahaa ee ay u xil-saareen wada-xaajoodka, iyagoo go’aansaday in ay si buuxda uga qeyb-galaan shirka ka socda Villa Soomaaliya.
Ajendaha kulanka maanta ayaa diiradda saaraya hannaanka doorashooyinka heer federaal iyo heer dowlad-goboleed, gaar ahaan xaaladda maamul-goboleedyada Koonfur Galbeed, Galmudug iyo HirShabeelle oo muddo-xileedkoodii dhammaaday. Golaha Mustaqbalka ayaa doonaya doorashooyin lagu heshiiyo, halka Dowladda Federaalka ay ku adkeysaneyso qabashada doorasho qof iyo cod ah.
Shirkan ayaa ku soo aadaya xilli xasaasi ah oo dalka wajahayo abaaro baahsan iyo xaalado bani’aadannimo, iyadoo Beesha Caalamkuna si dhow ula socoto wada-hadallada, kana dalbaneysa dhinacyada in ay gaaraan heshiis siyaasadeed.
