Wararka24: Wararka naga soo gaaraya gobolka Baay ayaa sheegaya in maanta dagaal culus uu ka dhacay duleedka magaalada Baydhabo, kaas oo u dhexeeyay ciidamada dowladda Soomaaliya iyo dagaalyahanno ka tirsan Al-Shabaab.
Dagaalka ayaa la sheegay inuu geystay khasaare dhimasho iyo dhaawac leh, waxaana lagu soo warramayaa in lagu dilay saraakiil sare oo ka tirsan ciidamada dowladda.
Saraakiisha la xaqiijiyay geeridooda waxaa kamid ah ku-simaha taliyaha Qeybta 60-aad ee Ciidanka Xoogga Dalka Soomaaliyeed, Gaashaanle Sare Yoonis Aadan, iyo taliyihii guutada 8-aad ee Qeybta 60-aad, Cali Caddow.
Sidoo kale, dadka deegaanka ayaa sheegay in dagaalka uu sababay khasaare kale oo soo gaaray ciidamada dowladda, islamarkaana gaadiid ciidan lagu gubay inta uu socday iska horimaadka.
Mas’uuliyiin ka tirsan dowladda federaalka ayaa qoraallo tacsi ah u diray ehellada iyo ciidamada ay ka geeriyoodeen labada sarkaal, iyadoo weli ay socdaan howlgalada ay ciidamada ka wadaan goobihii lagu dagaallamay.
Xaaladda deegaanka lagu dagaallamay ayaa weli kacsan, waxaana la sheegay in dhaqdhaqaaqyo ciidan laga dareemayo bannaanka Baydhabo, halkaas oo ay gaareen ciidamo gurmad ah.
Ilaa hadda dowladda Soomaaliya si rasmi ah ugama aysan hadlin faahfaahinta dagaalka iyo khasaaraha ka dhashay, marka laga reebo tacsiyada loo diray saraakiisha la dilay.
Dagaalkan ayaa kusoo aaday xilli maanta guddiga doorashooyinka Soomaaliya uu shaaciyay natiijada doorashooyinka goleyaasha deegaanka iyo wakiillada ee maamulka Koonfur Galbeed Soomaaliya.
