Wararka24: 12-02-2026 Safaaradda Mareykanka ee dalka Jabuuti ayaa Talaadadii soo saartay digniin amni oo ku socota muwaadiniinteeda, iyadoo ku boorisay inay muujiyaan feejignaan dheeraad ah xilli ay sii kordhayaan xiisadaha milateri ee gobolka.
Bayaan kasoo baxay safaaradda ayaa lagu sheegay in shaqaalaha dowladda Mareykanka ee ku sugan Jabuuti lagu amray inay sii wadaan ka fogaanshaha agagaarka safaaradda iyo xerada milateri ee Camp Lemonnier, sababo la xiriira hanjabaado iyo xaalado amni oo sii kordhaya.
Safaaraddu waxay sidoo kale sheegtay in la hakiyay dhammaan ballamihii caadiga ahaa ee qunsuliyadda, isla markaana la dhimay tirada shaqaalaha ka howlgala xarunta, inkasta oo ay weli sii soconayaan adeegyada degdegga ah ee qunsuliyadda.
Digniintan ayaa kusoo beegmaysa xilli ay sii xoogeysanayaan xiisadaha u dhexeeya Mareykanka, Israa’iil iyo Iiraan, kuwaas oo saameyn ku yeeshay amniga guud ee gobolka Bariga Dhexe iyo Geeska Afrika.
Dalka Jabuuti oo ku yaalla meel istaraatiiji ah oo isku xirta Badda Cas iyo Gacanka Cadmeed ayaa martigeliya saldhigga milateri ee Camp Lemonnier, kaas oo ah xarunta ugu weyn ee hawlgallada ciidamada Mareykanka ee Taliska Afrika (AFRICOM) ee ka socda gobolka.
