Wararka24: Dowladda Sacuudi Carabiya ayaa soo bandhigtay qorshe diblomaasiyadeed oo lagu doonayo heshiis dhexmara Iran iyo dalalka Bariga Dhexe, xilli gobolka uu wajahayo xiisado militari iyo kala qeybsanaan siyaasadeed oo sii xoogeysanaya.
Warbixin uu daabacay wargeyska Financial Times ayaa lagu sheegay in qorshahan uu ku saleysan yahay heshiiskii taariikhiga ahaa ee Helsinki sanadkii 1975, kaas oo xilligii Dagaalkii Qaboobaa lagu dejiyay xiisadihii Yurub.
Sacuudi Carabiya ayaa doonaysa in heshiiskan cusub lagu xoojiyo amniga gobolka, la yareeyo isku dhacyada militari, isla markaana la abuuro iskaashi ku saabsan dhaqaalaha, amniga iyo xasilloonida Bariga Dhexe.
Wararka ayaa sheegaya in dalal badan oo Carbeed iyo Midowga Yurub ay taageero u muujiyeen qorshahan, halka aan weli la ogeyn mowqifka ay ka qaadan doonaan Mareykanka iyo Israa’iil.
Dhanka kale,Imaaraadka Carabta ayaa lagu sheegay inuu qaatay mowqif adag oo ka dhan ah Iiraan, isagoo sii xoojiyay xiriirka kala dhexeeya Israa’iil tan iyo markii uu qarxay dagaalka gobolka.
Qorshahan cusub ayaa sidoo kale wajahaya caqabado waaweyn oo la xiriira arrimaha amniga iyo gacan ku haynta marin biyoodka Hormuz, halkaas oo Iiraan ay doonayso saameyn weyn oo istaraatiiji ah.
Warbixinta ayaa intaas ku dartay in dalalka Khaliijka ay hore uga walaacsanaayeen in dagaal toos ah oo lala galo Iiraan uu gobolka gelin karo xaalad adag oo aan sahlaneyn in laga soo kabto.
Sidoo kale, warar hore ayaa sheegay in Sacuudiga iyo Imaaraadka ay weeraro qarsoodi ah ku qaadeen gudaha Iiraan intii uu socday dagaalka gobolka, inkastoo aan si rasmi ah loo xaqiijin dhammaan faahfaahinta hawlgalladaas.
Xiisadda gobolka ayaa sii xoogeysatay kadib markii ay Iiraan gantaallo iyo diyaarado drones ah ku weerartay qaar kamid ah dalalka Gacanka, halka Mareykanka uu cadaadis ku saaray xulafadiisa Carabta inay qeyb ka noqdaan dagaalka ka dhanka ah Tehran.
Si kastaba, dadaallada cusub ee Sacuudiga ayaa loo arkaa isku day lagu doonayo in lagu qaboojiyo xiisadaha gobolka, inkastoo ay weli taagan yihiin caqabado siyaasadeed iyo kuwo militari oo adag.
