Wararka24: Wasaaradda Arrimaha Dibadda ee Sacuudi Carabiya ayaa si kulul u cambaareysay hanjabaaddii ay Xuutiyiinta Yemen ku sheegeen inay ku soo rogayaan “go’doomin dhanka badda ah” oo ka dhan ah maraakiibta Sacuudiga, iyadoo sheegtay inay qaadi doonto dhammaan tallaabooyinka lagama maarmaanka u ah ilaalinta maraakiibteeda si waafaqsan sharciga caalamiga ah.
Bayaan ay soo saartay wasaaraddu ayay ku beenisay eedeymaha Xuutiyiinta ee ah in Riyadh ay xannibaad ku hayso dekedaha ku yaalla waqooyiga Yemen. Waxay sheegtay in Sacuudi Carabiya ay sannadihii la soo dhaafay la shaqeynaysay dowladda Yemen ee caalamku aqoonsan yahay si loo yareeyo dhibaatada bani’aadantinimo ee ka jirta dalka.
Sida lagu sheegay bayaanka, boqortooyadu waxay taageero u fidisay Yemen iyadoo maalgelisay mashaariic horumarineed, taageertay miisaaniyadda dowladda, isla markaana bixisay shidaal lagu shaqeysiiyo xarumaha korontada.
Wasaaraddu waxay sidoo kale sheegtay in lixdii bilood ee ugu horreysay sanadkan ay in ka badan 300 oo markab oo siday cunto, shidaal, badeecooyin iyo agab dhisme ay gaareen dekedaha Hodeidah, Salif iyo Ras Isa ee waqooyiga Yemen.
Bayaanka ayaa intaas ku daray in Sacuudi Carabiya ay taageertay dadaallada Qaramada Midoobay ee lagu doonayo in nabad waarta laga hirgeliyo Yemen, iyadoo xustay in dowladda Yemen ay aqbashay qorshayaal nabadeed, halka Xuutiyiintu ay diideen, sida ay sheegtay wasaaraddu.
Sacuudi Carabiya ayaa ugu baaqday bulshada caalamka inay hirgeliyaan qaraarrada Golaha Ammaanka ee Qaramada Midoobay ee la xiriira Yemen, gaar ahaan Qaraarka 2216 iyo Qaraarka 2722, kuwaas oo ay sheegtay inay xoojinayaan amniga iyo xorriyadda isu socodka maraakiibta ee Badda Cas.
Xiisadda u dhexeysa Sacuudi Carabiya iyo Xuutiyiinta ayaa sii xoogeysatay toddobaadyadii u dambeeyay, kaddib duqeyn lagu qaaday Garoonka Diyaaradaha Sanca iyo ku dhawaaqistii Xuutiyiinta ee ahayd inay beegsanayaan maraakiibta Sacuudiga ee mara marin-biyoodka Baabul Mandab.
