Wararka24: Madaxweynaha Kenya William Ruto ayaa difaacay qorshe lagu dhisayo xarun karantiil oo uu taageerayo Mareykanka, taas oo laga hirgelinayo saldhig ciidan oo ku yaalla deegaanka Nanyuki ee gobolka Laikipia. Hadalkan ayaa yimid xilli qorshahan uu dhaliyay dood iyo dibadbaxyo ay sameeyeen qaar ka mid ah dadka deegaanka.
Ruto ayaa sheegay in Kenya ay waajib ku tahay inay u diyaargarowdo cudurrada faafa iyo xaaladaha caafimaad ee degdegga ah. Wuxuu xusay in dowladda ay qaaday tallaabooyin lagu xoojinayo awoodda caafimaadka dalka, gaar ahaan la socodka iyo ka hortagga cudurrada halista ah.
Xarunta la qorsheeyay ayaa la sheegay inay qaadi karto ilaa 50 qof, waxaana loogu talagalay dadka looga shakiya inay la kulmeen fayraska Ebola balse aan weli muujin calaamadaha cudurka. Dowladda Kenya ayaa ku adkeysatay in xaruntan ay qeyb ka tahay dadaallada lagu xoojinayo diyaar-garowga caafimaadka.
Dhinaca kale, qaar ka mid ah dadka deegaanka iyo hoggaamiyeyaasha gobolka ayaa walaac ka muujiyay mashruuca. Waxay sheegeen inay ka cabsi qabaan saameyn caafimaad oo ka dhalan karta xarunta, iyagoo dalbaday in si cad loo faahfaahiyo qorshaha iyo tallaabooyinka badbaado ee la qaadayo.
Maxkamadda Sare ee Kenya ayaa dhawaan si ku meel gaar ah u hakisay hirgelinta mashruuca, iyadoo amartay in la soo bandhigo heshiisyada iyo dukumentiyada la xiriira qorshaha. Sidoo kale, maxkamaddu waxay dalbatay in la caddeeyo qiimeynta laga sameeyay saameynta caafimaadka, deegaanka iyo amniga.
Wasiirka Caafimaadka Kenya Aadan Ducaale ayaa isna difaacay mashruuca, isagoo sheegay in xaruntu ay ka faa’iideysan karaan dhammaan dadka u baahan adeegyadaas. Dowladda ayaa sidoo kale sheegtay inay tababartay boqolaal shaqaale oo caafimaadka ah si ay uga jawaabaan khataraha cudurrada faafa.
Arrintan ayaa kusoo beegmaysa xilli dalalka waqooyi-bari Congo iyo Uganda ay la tacaalayaan kiisas la xiriira Ebola, halka Kenya ay sheegtay in aan weli laga diiwaangelin wax kiis ah oo cudurkaas ah.
Wasiirka Caafimaadka Kenya Aadan Ducaale:
