Wararka24: Ra’iisul Wasaaraha Soomaaliya Xamza Cabdi Barre ayaa wareegto uu soo saaray xilalkii uga qaaday laba wasiiru dowle oo ka tirsanaa xukuumaddiisa.
Masuuliyiinta xilalka laga qaaday ayaa kala ah Wasiiru dowlaha Wasaaradda Batroolka iyo Macdanta Ismaaciil Shire Jaamac iyo Wasiiru dowlaha Wasaaradda Beeraha iyo Waraabka Asad Cabdirisaaq Maxamed.
Qoraalka kasoo baxay xafiiska Ra’iisul Wasaaraha ayaa lagu sheegay in go’aankan lagu gaaray iyadoo la cuskaday qodobada 120aad iyo 117aad ee dastuurka Jamhuuriyadda Federaalka Soomaaliya iyo xeer hoosaadka Golaha Wasiirrada.
Xukuumadda ayaa tilmaamtay in tallaabadan ay qeyb ka tahay dadaallo lagu xoojinayo howlaha wasaaradaha iyo hufnaanta shaqo.
Ra’iisul Wasaaraha ayaa sidoo kale uga mahadceliyay masuuliyiinta xilalka laga qaaday shaqadii ay u hayeen qaranka, isaga oo u rajeeyay mustaqbal wanaagsan.
Mid ka mid ah wasiiru dowlayaasha xilka laga qaaday ayaa dhowaan kasoo muuqday shir ka dhacay Garoowe oo uu qabtay madaxweynaha Puntland, halkaas oo uu ka jeediyay hadallo dhaliil u jeedinaya dowladda federaalka.
Tallaabadan ayaa kusoo aadaysa xilli ay xukuumaddu wado isbeddello la xiriira maamulka iyo hay’adaha dowladda, oo ay ku jiraan magacaabista taliyaha cusub ee ciidanka Asluubta Soomaaliyeed.
