Wararka24: 3-02-2026 Dowladaha Imaaraadka Carabta iyo Qatar ayaa la sheegay inay wadaan dadaallo diblomaasiyadeed oo ay kula xiriirayaan xulafadooda reer Galbeedka, si ay gacan uga helaan in Madaxweynaha Mareykanka Donald Trump lagu qanciyo in la soo gaabiyo hawlgallada milatari ee ka dhanka ah Iiraan.
Ilo xog-ogaal ah oo ay soo xigatay warbaahinta caalamiga ah ayaa tilmaamay in labada dal ay doonayaan in xiisadda lagu soo afjaro waddo diblomaasiyadeed, si looga hortago in colaadda ay ku fido guud ahaan gobolka Khaliijka.
Walaaca ugu weyn ayaa la sheegay inuu la xiriira saameynta dhaqaale, gaar ahaan qiimaha tamarta iyo amniga marinnada maraakiibta.
Qiimeyn ay samaysay dowladda Qatar ayaa lagu sheegay in haddii marinnada badda ay sii xirnaadaan maalmo dheeraad ah, ay suuqyada caalamka la kulmi karaan saameyn ballaaran.
Wararka ayaa sidoo kale sheegaya in weerarro lagu bartilmaameedsaday kaabayaal tamareed ay sare u qaadeen qiimaha gaaska dabiiciga ah ee suuqyada Yurub.
Dhanka kale, labada dal ayaa la sheegay inay ka shaqeynayaan xoojinta nidaamyada difaaca cirka, iyagoo codsiyo taageero u diray xulafadooda.
Warbixinno ayaa tilmaamaya in kaydka qaar ka mid ah gantaallada difaaca cirka ee la adeegsado uu ku filnaan karo muddo kooban haddii xaaladdu sidan ku sii socoto.
Madaxda Imaaraadka iyo Qatar ayaa la sheegay inay khadka telefoonka kula xiriireen hoggaamiyeyaasha qaar ka tirsan Yurub, si ay uga wada hadlaan xaaladda amni iyo suurtagalnimada xal diblomaasiyadeed. Ilaa iyo hadda, ma jiro war rasmi ah oo kasoo baxay Aqalka Cad oo ku saabsan codsiyadan.
